ભોપાલ:મધ્યપ્રદેશમાં વિધાનસભાની ચૂંટણીના થોડા મહિના પહેલા મહિલા મતદારો પર મોટો દાવ લગાવતા રાજ્યની શિવરાજ સિંહ ચૌહાણની આગેવાની હેઠળની ભાજપ સરકાર રવિવારથી ‘લાડલી બહના યોજના’ શરૂ કરવા માટે તૈયાર છે, જે હેઠળ રાજ્યની લાયકાત ધરાવતી મહિલાઓને 1,000 રૂપિયાની માસિક સહાય આપવામાં આવશે.અધિકારીઓએ શનિવારે જણાવ્યું હતું કે,ભોપાલના જંબુરી ગ્રાઉન્ડ ખાતે યોજાનાર કાર્યક્રમમાં શહેરી અને ગ્રામીણ વિસ્તારોમાંથી ઓછામાં ઓછી એક લાખ મહિલાઓ ભાગ લે તેવી શક્યતા છે.
આ કાર્યક્રમની શરૂઆત મુખ્યમંત્રી ચૌહાણના 65માં જન્મદિવસથી થશે.રાજકીય વિશ્લેષકોના મતે, આ યોજના દ્વારા ભાજપ સરકાર રાજ્યને સંદેશ આપવા માંગે છે કે તે તેના મહિલા નાગરિકોની સાથે મક્કમતાથી ઉભી છે.નોંધપાત્ર વાત એ છે કે, 2018ની વિધાનસભા ચૂંટણીમાં ભગવા પાર્ટી કોંગ્રેસ સામે ઓછા માર્જિનથી હારી ગઈ હતી. તેથી આ વખતે તે મહિલા મતદારોને સારી સ્થિતિમાં રાખીને ચૂંટણી જીતવા માંગે છે.
છેલ્લી ચૂંટણીમાં, કોંગ્રેસ 15 વર્ષના અંતરાલ પછી સત્તામાં આવી હતી, પરંતુ જ્યોતિરાદિત્ય સિંધિયાએ 22 ધારાસભ્યો સાથે કોંગ્રેસ છોડી દીધી હતી, જેના કારણે કમલનાથની આગેવાનીવાળી સરકારનું પતન થયું હતું. રાજ્યના નાણામંત્રી જગદીશ દેવડાએ 1 માર્ચે વિધાનસભામાં રાજ્યનું વર્ષ 2023-24નું બજેટ રજૂ કરતી વખતે કહ્યું હતું કે, “સરકારે ‘મુખ્ય મંત્રી લાડલી બહના યોજના’ માટે 8,000 કરોડ રૂપિયા અલગ રાખ્યા છે, જે હેઠળ મહિલાઓને અમુક શરતો હેઠળ દર મહિને 1,000 રૂપિયાની નાણાકીય સહાય આપવામાં આવશે.
અધિકારીઓએ જણાવ્યું કે સરકાર 5 માર્ચથી મહિલા લાભાર્થીઓની અરજીઓ સ્વીકારવાનું શરૂ કરશે. તેમણે કહ્યું કે માર્ચ-એપ્રિલમાં અરજીઓ સ્વીકારવાનું કામ પૂર્ણ થઈ જશે અને 10 જૂન સુધીમાં લાભાર્થીઓને આર્થિક સહાય મળવાનું શરૂ થઈ જશે. અધિકારીઓએ જણાવ્યું કે જે મહિલાઓના પરિવારની આવક વાર્ષિક રૂ. 2.5 લાખથી ઓછી છે તેમને લાડલી બહના યોજનાનો લાભ આપવામાં આવશે.
તેમણે કહ્યું કે,રાજ્યમાં 2,60,23,733 મહિલા મતદારો છે.મધ્યપ્રદેશની કુલ 230 વિધાનસભા બેઠકોમાંથી, 18 મતક્ષેત્રોમાં પુરૂષ મતદારો કરતાં મહિલા મતદારો વધુ છે, જેમાં આદિવાસી બહુલ બાલાઘાટ, મંડલા, ડિંડોરી, અલીરાજપુર અને ઝાબુઆ જિલ્લાનો સમાવેશ થાય છે.અંદાજ મુજબ 13.39 લાખ નવા મતદારોમાંથી 7.07 લાખ મહિલાઓ છે.