દિલ્હી:બ્રિટનના નવા વડા પ્રધાન લિઝ ટ્રસે મંગળવારે જણાવ્યું હતું કે,તેઓ આર્થિક વૃદ્ધિને પ્રાથમિકતા આપશે, ઉર્જા સંકટનો સામનો કરશે અને આરોગ્ય સેવાઓની પહોંચમાં સુધારો કરશે.ટ્રસે 10 ડાઉનિંગ સ્ટ્રીટની બહાર વડાપ્રધાન તરીકે રાષ્ટ્રને પોતાના પ્રથમ સંબોધનમાં કહ્યું કે,મને વિશ્વાસ છે કે સાથે મળીને આપણે તુફાનમાંથી બહાર નીકળી શકીએ છીએ.આપણે આપણી અર્થવ્યવસ્થાને ફરીથી બનાવી શકીએ છીએ.2021ના શિયાળા બાદ બ્રિટનમાં મોંધવારી સતત વધી રહી છે.
અધિકૃત ડેટા દર્શાવે છે કે,જુલાઈમાં ગ્રાહક ભાવ સૂચકાંક 10.1 ટકા વધ્યો હતો, જે બેન્ક ઓફ ઈંગ્લેન્ડ દ્વારા નિર્ધારિત બે ટકાના લક્ષ્યાંક કરતાં વધુ હતો.અગાઉના દિવસે ટ્રસ સ્કોટલેન્ડમાં રાણી એલિઝાબેથ II ને ‘હાથના ચુંબન’ સમારોહ માટે મળ્યા હતા અને સરકાર રચવા માટે રાણીના આમંત્રણનો સ્વીકાર કર્યો હતો.
તેમણે કહ્યું કે,હું બ્રિટનને ફરીથી કામ કરાવીશ.મારી પાસે ટેક્સ કાપ અને સુધારા દ્વારા અર્થવ્યવસ્થાને વિકસિત કરવાની હિંમતવાન યોજના છે.હું સખત મહેનતનું વળતર આપવા અને વ્યવસાય-આગેવાની વૃદ્ધિ અને રોકાણને પ્રોત્સાહન આપવા માટે કરમાં ઘટાડો કરીશ. તેમણે જણાવ્યું હતું કે,ઊર્જા બિલનો સામનો કરવા અને બ્રિટનના ભાવિ ઊર્જા પુરવઠાને સુરક્ષિત કરવા માટે આ અઠવાડિયે પગલાં લેવામાં આવશે.