ચારધામ યાત્રાઃ યાત્રિકોની સંખ્યામાં વધારો,જાણો હવે દરરોજ કેટલા ભક્તો દર્શન કરી શકશે

• ચારધામ યાત્રા: યાત્રિકોની સંખ્યામાં વધારો
• જાણો હવે દરરોજ કેટલા ભક્તો કરી શકશે દર્શન
• કોરોનાને કારણે બે વર્ષથી બંધ હતી આ યાત્રા

દહેરાદુન:ઉત્તરાખંડમાં ચારધામ યાત્રામાં આવનારા ભક્તોની ભારે ભીડને જોતા દરેક ધામમાં દરરોજ દર્શન માટે અગાઉથી નિર્ધારિત મહત્તમ સંખ્યામાં એક હજારનો વધારો કરવામાં આવ્યો છે. રાજ્યના ઉચ્ચ ગઢવાલ હિમાલયમાં સ્થિત ચાર ધામ-બદ્રીનાથ, કેદારનાથ, ગંગોત્રી અને યમુનોત્રીમાં હવે પહેલા કરતા દરરોજ એક હજાર વધુ શ્રદ્ધાળુઓ મંદિરોમાં દર્શન કરી શકશે. હાલમાં આ વ્યવસ્થા ટ્રાવેલ સીઝનના પ્રથમ 45 દિવસ માટે કરવામાં આવી છે.

અધિકારીઓએ બુધવારે અહીં જણાવ્યું હતું કે,સરકારે આ સંબંધમાં પોતાના અગાઉના આદેશમાં સુધારો કરીને બદ્રીનાથના દર્શન માટે પ્રતિદિન 16000, કેદારનાથ માટે 13000, ગંગોત્રી માટે 8000 અને યમુનોત્રી માટે 5000 શ્રદ્ધાળુઓની સંખ્યા નક્કી કરી છે.અગાઉ આ મર્યાદા બદ્રીનાથ માટે 15,000 પ્રતિ દિવસ, કેદારનાથ માટે 12,000, ગંગોત્રી માટે 7,000 અને યમુનોત્રી માટે 4000 હતી.

કોવિડ-19ના કારણે છેલ્લા બે વર્ષથી અવરોધાયેલી ચારધામ યાત્રામાં આ વખતે શ્રદ્ધાળુઓ મોટી સંખ્યામાં આવી રહ્યા છે અને તેમની સુવિધાને ધ્યાનમાં રાખીને મુખ્યમંત્રી પુષ્કરસિંહ ધામીએ પ્રતિદિન દર્શનાર્થીઓની સંખ્યામાં વધારો કરવા વહીવટીતંત્રને સૂચના આપી હતી.ગંગોત્રી અને યમુનોત્રી ધામના દરવાજા 3 મેના રોજ ખોલવામાં આવ્યા હતા, જ્યારે કેદારનાથના દરવાજા 6 મે અને બદ્રીનાથના દરવાજા 8 મેના રોજ ખુલ્યા હતા.સત્તાવાર આંકડાઓ અનુસાર, 9 મે સુધી 20 લાખથી વધુ શ્રદ્ધાળુઓએ ચાર ધામની મુલાકાત લીધી છે.