દિવાળી 2022: સોનામાંથી બનેલી આ મીઠાઈ,જાણો તેની ખાસિયત
મુંબઈ:મહારાષ્ટ્રના અમરાવતીમાં 11 હજાર રૂપિયાની એક કિલો મીઠાઈ આજકાલ આકર્ષણનું કેન્દ્ર બનેલી છે.ડ્રાય ફ્રૂટ્સની સાથે ગોલ્ડ પ્લેટિંગ કરીને આ મીઠાઈ બનાવવામાં આવી રહી છે. આ મીઠાઈને જોવા અને ખરીદવા લોકો ઉમટી રહ્યા છે.દુકાનદારનું કહેવું છે કે આ વખતે દિવાળીને ધ્યાનમાં રાખીને આ મીઠાઈ ખાસ તૈયાર કરવામાં આવી છે.
મળતી માહિતી મુજબ, આ મીઠાઈ મહારાષ્ટ્રના અમરાવતીમાં રઘુવીર સ્વીટ્સ શોપમાં તૈયાર કરવામાં આવી છે.સોનાથી બનેલી આ મીઠાઈ લોકો માટે આકર્ષણનું કેન્દ્ર છે.જે પણ વ્યક્તિ આ મીઠાઈની કિંમત સાંભળે છે તો તેને નવાઈ લાગે છે કે મીઠાઈમાં આવું શું છે. તેને બનાવનાર દુકાનદાર ચંદ્રકાંત પોપટનો દાવો છે કે આ મીઠાઈ ડ્રાયફ્રૂટ્સમાંથી બનાવવામાં આવે છે અને તેના પર ગોલ્ડ વર્ક ચઢાવવામાં આવે છે, જે સ્વાસ્થ્ય માટે પણ સારું છે, કારણ કે આયુર્વેદમાં સોનું અને સોનાનો અર્ક સારો માનવામાં આવે છે.
આ મીઠાઈમાં બદામ, પિસ્તા અને અન્ય ડ્રાય ફ્રૂટ્સ ઉમેરવામાં આવે છે.તેને વેચતા દુકાનદારનું કહેવું છે કે,આ મીઠાઈ માત્ર અમરાવતી જ નહીં વિદેશમાં પણ મોકલવામાં આવી રહી છે.
આ મીઠાઈને જોવા અને ચાખવા ગ્રાહકો દુકાને પહોંચી રહ્યા છે. તે જ સમયે, આ પ્રસંગે હાજર એક ગ્રાહકે જણાવ્યું હતું કે ફટાકડા ઓછા ફોડીશું, પરંતુ આ મીઠાઈ, જે સ્વાસ્થ્ય માટે સારી છે, તે ચોક્કસપણે ટ્રાય કરીશું.
