PM મોદીનો વિશ્વમાં ડંકો,પાપુઆ ન્યુ ગિની અને ફિજીએ તેમના દેશના સર્વોચ્ચ સન્માનથી નવાજ્યા
દિલ્હી : આ દિવસોમાં દુનિયામાં ભારતનો ડંકો વાગી રહ્યો છે. ઘણા દેશોએ વડાપ્રધાન નરેન્દ્ર મોદીને તેમના સર્વોચ્ચ સન્માનથી સન્માનિત કર્યા છે અને આ પ્રક્રિયા ચાલી રહી છે. પાપુઆ ન્યુ ગિની અને ફિજી બંનેએ પીએમ મોદીને તેમના દેશના સર્વોચ્ચ સન્માનથી નવાજ્યા છે. ફિજીએ પીએમ મોદીને ‘કમ્પેનિયન ઓફ ધ ઓર્ડર ઓફ ફિજી’થી સન્માનિત કર્યા છે, જ્યારે યજમાન દેશ પાપુઆ ન્યુ ગિનીએ પીએમ મોદીને તેના સર્વોચ્ચ સન્માન ‘ધ ગ્રાન્ડ કમ્પેનિયન ઓફ ધ ઓર્ડર ઓફ લોગોહુ’થી નવાજ્યા છે.
પીએમ મોદી જાપાનથી સીધા પાપુઆ ન્યુ ગિની પહોંચ્યા છે. આજે તેમણે ત્યાં ત્રીજા ઈન્ડો-પેસિફિક આઈલેન્ડ કોઓપરેશન (FIPIC) સમિટમાં હાજરી આપી હતી. પાપુઆ ન્યુ ગિનીના વડા પ્રધાન જેમ્સ મારાપે સાથે કોન્ફરન્સની સહ-અધ્યક્ષતા કરતાં વડા પ્રધાન મોદીએ જણાવ્યું હતું કે તેઓ (જેમ્સ મરાપે) ભારતને વિશ્વસનીય ભાગીદાર તરીકે જોઈ શકે છે.
પીએમ મોદીએ પણ મારાપેને શક્ય તમામ મદદની ખાતરી આપી હતી. FIPIC ની શરૂઆત 2014માં મોદીની ફિજીની મુલાકાત દરમિયાન કરવામાં આવી હતી. આ સમિટ એવા સમયે થઈ રહી છે જ્યારે ચીન આ ક્ષેત્રમાં પોતાનો સૈન્ય અને રાજદ્વારી પ્રભાવ વધારવાના પ્રયાસો કરી રહ્યું છે.
વડાપ્રધાન મોદીએ પાપુઆ ન્યુ ગિનીના વડાપ્રધાન જેમ્સ મારાપેને પોતાના સંબોધનમાં કહ્યું, ‘ભારતને તમારા વિકાસ ભાગીદાર હોવાનો ગર્વ છે. માનવતાવાદી સહાય હોય કે તમારો વિકાસ, તમે ભારતને વિશ્વસનીય ભાગીદાર તરીકે જોઈ શકો છો અને વિશ્વાસ કરી શકો છો. અમે અમારા અનુભવ અને ક્ષમતાઓ તમારી સાથે કોઈપણ ખચકાટ વિના શેર કરવા તૈયાર છીએ. ડિજિટલ ટેક્નોલોજી હોય કે સ્પેસ ટેક્નોલોજી, સ્વાસ્થ્ય સુરક્ષા હોય કે ખાદ્ય સુરક્ષા, ક્લાઈમેટ ચેન્જ હોય કે અન્ય, અમે દરેક રીતે તમારી સાથે છીએ.
