નવી દિલ્હીઃ ઇઝરાયેલ પર હમાસના હુમલા બાદ શરૂ થયેલા યુદ્ધ વચ્ચે હિઝબુલ્લાએ ઇઝરાયેલ પર મોટો હુમલો કર્યો હતો. ઉગ્રવાદી સંગઠન હિઝબુલ્લાહે ગાલીલીના ઉત્તરીય વિસ્તાર પર એક સાથે 40 થી વધુ રોકેટ છોડ્યા અને આ રોકેટ હુમલાઓની જવાબદારી સ્વીકારી હતી. લેબનોનમાં ઈરાનના હિઝબુલ્લાહે એક નિવેદનમાં જણાવ્યું હતું કે, તેણે ઉત્તરી ઈઝરાયેલમાં ઈઝરાયેલી આર્મી આર્ટિલરીને નિશાન બનાવીને ડઝનબંધ રોકેટ છોડ્યા હતા.
ઈઝરાયેલ ડિફેન્સ ફોર્સ (IDF) એ રોકેટ હુમલાની પુષ્ટિ કરી છે અને કહ્યું હતું કે, કોઈને ઈજા થઈ નથી. IDFના વોર રૂમે પણ હુમલાનો વીડિયો જાહેર કર્યો છે. બીજી તરફ લેબનોનમાં થયેલા રોકેટ હુમલા બાદ અમેરિકા વધુ સતર્ક થઈ ગયું છે. એક અમેરિકન અધિકારીએ કહ્યું છે કે ઈરાની હુમલાની આશંકા વચ્ચે અમેરિકા મધ્ય પૂર્વમાં વધારાના સૈનિકો મોકલી રહ્યું છે.
લગભગ 40 રોકેટ લેબનીઝના પ્રદેશમાંથી ઉત્તરી ઇઝરાયેલમાં છોડવામાં આવ્યા હતા, IDF એ જણાવ્યું હતું કે, જેમાંથી કેટલાકને આયર્ન ડોમ એર ડિફેન્સ સિસ્ટમ દ્વારા નાશ કરવામાં આવ્યા હતા જ્યારે અન્ય ખુલ્લા વિસ્તારોને અસર કરી હતી અથવા લેબનોનની અંદર પડ્યા હતા. ઘટના દરમિયાન સાયરન વાગતી રહી. અગાઉ, IDFએ કહ્યું હતું કે, એર ડિફેન્સે ઉત્તરી ઇઝરાયેલમાં હિઝબોલ્લાહ દ્વારા શરૂ કરાયેલા બે વિસ્ફોટક ભરેલા ડ્રોનને તોડી પાડ્યા હતા.
બીજી તરફ લેબનોનમાં થયેલા રોકેટ હુમલા બાદ અમેરિકા વધુ સતર્ક થઈ ગયું છે. અમેરિકન અધિકારીએ કહ્યું હતું કે, ઈરાની હુમલાના ભય વચ્ચે અમેરિકા મધ્ય પૂર્વમાં વધારાના સૈનિકો મોકલી રહ્યું છે. પરંતુ ગલ્ફ રાજ્યોએ અમેરિકા માટે એક નવી સમસ્યા ઊભી કરી છે. કુવૈત અને કતારે યુનાઇટેડ સ્ટેટ્સને ચેતવણી આપી છે કે તેઓ ઇરાન પર હુમલો કરવા માટે તેમની જમીન પરના સૈન્ય મથકોનો ઉપયોગ કરવા દેશે નહીં. તમને જણાવી દઈએ કે, ગલ્ફ દેશમાં અમેરિકાનું એક વિશાળ સૈન્ય મથક છે જ્યાં લગભગ 40 હજાર સૈનિકો તૈનાત છે.