અંબાજીઃ બનાસકાંઠાના તમામ તાલુકાઓમાં હર ઘર તિરંગા અંતર્ગત કાર્યક્રમોનું યોજાય રહ્યા છે. જેમાં અંબાજી એસ ટી ડેપો તંત્ર દ્વારા તેની ગૌરવભેર ઉજવણી કરવામાં આવી હતી. મુસાફર જનતામાં દેશભક્તિની ભાવના જાગૃત થાય અને સલામત સવારી એસ.ટી.અમારી સૂત્રને સાર્થક કરવામાં મુસાફરો પણ સહયોગ આપે એવા હેતુથી અંબાજી ડેપો ખાતે હર ઘર તિરંગા અભિયાનની ઊજવણી કરવામાં આવી હતી. તમામ સ્ટાફ અને કચેરીઓમાં તિરંગો લહેરાઈ ઉઠતાં અંબાજી ડેપો દેશભક્તિના રંગમાં રંગાયેલું જોવા મળ્યું હતું. હર ઘર તિરંગા અભિયાનમાં એસટી ડેપોના કર્મચારીઓ તેમજ પ્રવાસીઓ પણ જોડાયા હતા.
અંબાજી એસટી ડેપોમાં હર ઘર તિરંગા અભિયાન અંતર્ગત કાર્યક્રમનું આયોજન કરવામાં આવ્યું હતું. આ અભિયાન હેઠળ મુસાફર જનતાને તિરંગાનું વિતરણ કરાયું હતું. ડ્રાઈવર, કંડકટર અને ડેપોના કર્મચારીઓ દ્વારા ઉત્સાહભેર આ અભિયાનમાં ભાગ લેવા ડેપો મેનેજર રઘુવીરસિંહ દ્વારા પ્રેરણા પૂરી પાડવામાં આવી હતી. એસ.ટીમાં ગંદકી ન કરવી અને એસ.ટી. બસમાં સ્વચ્છતા જાળવવી એ પણ એક પ્રકારની દેશ સેવા છે એવી અપીલ સાથે મુસાફર જનતાને દેશભક્તિનો સંદેશ આપવામાં આવ્યો હતો.
આ અભિયાનમાં અંબાજી એસટી ડેપોના કર્મચારી મિત્રો સાથે મુસાફર જનતાએ પણ હાથમાં તિરંગો પકડી સેલ્ફી પડાવી તિરંગા પ્રત્યેની સન્માનની ભાવના પ્રદર્શિત કરી હતી. વિભાગીય નિયામક , વિભાગીય પરિવહન અધિકારી , વિભાગીય હિસાબી અધિકારી વગેરેની પ્રેરક ઉપસ્થિતિમાં આ કાર્યક્રમની ગૌરવભેર ઉજવણી કરવામાં આવી હતી. એસટી બસના પ્રવાસીઓને તિરંગાનું વિતરણ કરાયું હતું. અને એસટીબસના ડ્રાઈવરો અને કંડકટરોએ પણ તિરંગાને સલામી આપી હતી.
