નવી દિલ્હીઃ ઈન-સ્પેસે ભારતના અવકાશ અર્થતંત્રના વિકાસને ટેકો આપવા માટે રૂ. 1,000 કરોડના વેન્ચર કેપિટલ ફંડની દરખાસ્ત કરી હતી. જેનું મૂલ્ય હાલમાં $8.4 બિલિયન છે, જેમાં 2033 સુધીમાં $44 બિલિયન સુધી પહોંચવાનો લક્ષ્યાંક છે. ત્યારે કેન્દ્રીય કેબિનેટે ગુરુવારે ઈન્ડિયન નેશનલ સ્પેસ પ્રમોશન એન્ડ ઓથોરાઈઝેશન સેન્ટર (IN-SPACE) ને મંજૂરી આપી છે. અવકાશ ક્ષેત્ર માટે રૂ. 1 હજાર કરોડના વેન્ચર કેપિટલ ફંડની સ્થાપનાને મંજૂરી આપવામાં આવી છે. કેન્દ્રીય માહિતી અને પ્રસારણ મંત્રી અશ્વિની વૈષ્ણવે ગુરુવારે આ માહિતી આપી હતી.
સેબીના નિયમો હેઠળ વૈકલ્પિક રોકાણ ફંડ તરીકે કામ કરશે
ભારત સરકારે અવકાશ ક્ષેત્રના સુધારાઓ હેઠળ, અવકાશ પ્રવૃત્તિઓમાં ખાનગી ક્ષેત્રની ભાગીદારીને પ્રોત્સાહન આપવા અને તેનું નિરીક્ષણ કરવા માટે IN-SPACE ની સ્થાપના કરી હતી. સરકાર સમર્થિત ફંડ રોકાણકારોનો વિશ્વાસ વધારશે, ખાનગી મૂડીને આકર્ષિત કરશે અને અવકાશ સુધારાને આગળ ધપાવવા સરકારની પ્રતિબદ્ધતા તરીકે સેવા આપશે. તે સેબીના નિયમો હેઠળ વૈકલ્પિક રોકાણ ફંડ તરીકે કામ કરશે, સ્ટાર્ટઅપ્સને પ્રારંભિક તબક્કાની ઇક્વિટી પ્રદાન કરશે અને તેમને વધુ ખાનગી ઇક્વિટી રોકાણો કરવા સક્ષમ બનાવશે.
વ્યાવસાયિક સેવાઓમાં હજારો પરોક્ષ નોકરીઓનું સર્જન કરી શકે છે
અપસ્ટ્રીમ, મિડસ્ટ્રીમ અને ડાઉનસ્ટ્રીમમાં સ્ટાર્ટઅપ્સને ટેકો આપીને ભારતીય સ્પેસ સેક્ટરમાં રોજગારીને વેગ આપવાનું લક્ષ્ય રાખવામાં આવ્યું છે. આનાથી વ્યવસાયોના વિસ્તરણ, સંશોધન અને વિકાસમાં રોકાણ અને કર્મચારીઓના વિસ્તરણમાં મદદ મળશે. દરેક રોકાણ એન્જિનિયરિંગ, સોફ્ટવેર ડેવલપમેન્ટ, ડેટા એનાલિસિસ અને મેન્યુફેક્ચરિંગ જેવા ક્ષેત્રોમાં સેંકડો સીધી નોકરીઓ તેમજ સપ્લાય ચેઇન, લોજિસ્ટિક્સ અને વ્યાવસાયિક સેવાઓમાં હજારો પરોક્ષ નોકરીઓનું સર્જન કરી શકે છે. આ નવીનતાને વેગ આપશે અને અવકાશ બજારમાં ભારતની વૈશ્વિક સ્પર્ધાત્મકતાને વેગ આપશે.