નવી દિલ્હીઃ અમેરિકા અને વેસ્ટ ઈન્ડિઝમાં હાલ ટી20 વિશ્વકપ રમાઈ રહ્યો છે અને ટીમ ઈન્ડિયા આ ટૂર્નામેન્ટમાં અત્યાર સુધી સારુ પ્રદર્શન કરી રહી છે. બીજી તરફ ટીમ ઈન્ડિયાના સિનિયર કોચ તરીકે પૂર્વ ક્રિકેટર ગૌત્તમ ગંભીરનું નામ ચર્ચાય રહ્યું છે. દરમિયાન પૂર્વ ભારતીય ઓપનર ગૌતમ ગંભીરે ઈન્ટરનેશનલ ક્રિકેટ કાઉન્સિલ (ICC)ને સફેદ બોલના ક્રિકેટમાં બે નવા બોલના નિયમ પર પુનર્વિચાર કરવાની સલાહ આપી છે. તેમણે કહ્યું કે આ ફિંગર સ્પિનરો માટે અયોગ્ય છે. ICCએ ઓક્ટોબર 2011માં ODI મેચોમાં આ ખાસ નિયમ લાગુ કર્યો હતો.
ઇન્ડિયન ચેમ્બર ઓફ કોમર્સના ‘રાઇઝ ટુ લીડરશિપ’ ટોક શો દરમિયાન ગંભીરે જણાવ્યું હતું કે, “એક વસ્તુ હું ચોક્કસપણે બદલવા માંગુ છું કે સફેદ બોલના ફોર્મેટમાં બે નવા બોલનો ઉપયોગ કરવો.” ઘણા નિષ્ણાતો માને છે કે બે નવા બોલનો ઉપયોગ ફિંગર સ્પિનરોને ગેરલાભમાં મૂકે છે અને ઝડપી બોલરો માટે રિવર્સ સ્વિંગની શક્યતા ઘટાડે છે. રાહુલ દ્રવિડ બાદ ભારતીય ટીમના કોચ બનવાની રેસમાં રહેલા ગંભીરે વધુમાં કહ્યું હતું કે, ‘આ ફિંગર સ્પિનરો માટે ખૂબ જ અયોગ્ય છે.’
કોલકાતા નાઈટ રાઈડર્સે તાજેતરમાં ગંભીરના માર્ગદર્શન હેઠળ ત્રીજું આઈપીએલ ટાઈટલ જીત્યું હતું. તેમણે કહ્યું કે, ‘આઈસીસીનું કામ એ સુનિશ્ચિત કરવાનું છે કે દરેક વ્યક્તિને તેમની પ્રતિભા દર્શાવવાની સમાન તક મળે, પછી ભલે તે ફિંગર સ્પિનર હોય, ફાસ્ટ બોલર હોય, રિસ્ટ સ્પિનર હોય કે બેટ્સમેન હોય.’
તેમણે વધુમાં કહ્યું કે, જો તમારો ઈરાદો ટીમને કોઈપણ વ્યક્તિ કરતા આગળ રાખવાનો છે તો વસ્તુઓ આપોઆપ થઈ જશે. આજે નહીં તો કાલે, કાલે નહીં તો બીજા દિવસે, સારું રહેશે. પરંતુ જો તમે એક કે બે ખેલાડીઓને પ્રદર્શન કરવામાં મદદ કરશો તો તમારી ટીમને નુકસાન થશે. મારું કામ વ્યક્તિગત ખેલાડીઓને સારું પ્રદર્શન કરાવવાનું નથી. તેના બદલે, માર્ગદર્શક તરીકે મારું કામ કેકેઆરને જીતવામાં મદદ કરવાનું હતું. મારા માટે ગુરુ મંત્ર ટીમને પ્રથમ સ્થાન આપવાનો છે. મને લાગે છે કે ટીમને પ્રથમ રાખવાની ફિલોસોફી કોઈપણ ટીમની રમતમાં સૌથી મહત્વપૂર્ણ છે.