નવી દિલ્હીઃ કેન્દ્રીય બજેટ 2024 નાણા મંત્રી નિર્મલા સીતારમણ 22 જુલાઈએ સંસદમાં રજૂ કરશે. આ સિવાય આર્થિક સર્વે 3 જુલાઈના રોજ જાહેર થવાની ધારણા છે. રિપોર્ટ અનુસાર, સામાન્ય ચૂંટણી પહેલા, વચગાળાનું બજેટ 1 ફેબ્રુઆરી 2024 ના રોજ લાવવામાં આવ્યું હતું અને હવે લોકસભા ચૂંટણી પૂર્ણ થયા પછી, નવી સરકારની રચના કરવામાં આવી છે જે સંપૂર્ણ બજેટની જાહેરાત કરશે.
નાણાં પ્રધાન નિર્મલા સીતારમણે તાજેતરમાં જ પોતાના કાર્યાલયનો ચાર્જ સંભાળ્યો હતો અને તેઓ ઝડપથી નાણાકીય યોજનાઓ અને કામોમાં વ્યસ્ત છે. બીજી તરફ GST કાઉન્સિલની 53મી બેઠક 22 જૂને યોજાવા જઈ રહી છે, જેની અધ્યક્ષતા નાણામંત્રી કરશે. આ સિવાય નાણા મંત્રાલયે એક નોટિફિકેશન બહાર પાડીને જણાવ્યું છે કે જનરલ પ્રોવિડન્ટ ફંડ (GPF)માં યોગદાન આપનારા કેન્દ્રીય કર્મચારીઓને પ્રથમ ક્વાર્ટરમાં 7.1 ટકા વ્યાજ મળશે. આ અંતર્ગત નાણાકીય વર્ષ 2023-24માં 1 એપ્રિલથી 30 જૂન વચ્ચેના ફંડ પર 7.1 ટકા વ્યાજ આપવામાં આવશે.
18મી લોકસભાનું પ્રથમ સંસદ સત્ર 24 જૂનથી શરૂ થશે અને 3 જુલાઈ સુધી ચાલશે. સંસદ સત્રના પ્રથમ ત્રણ દિવસમાં નવા ચૂંટાયેલા સાંસદો શપથ લેશે અને ગૃહના અધ્યક્ષની પણ પસંદગી કરવામાં આવશે. કેન્દ્રીય મંત્રી કિરેન રિજિજુના જણાવ્યા અનુસાર, લોકસભાનું પ્રથમ સત્ર 24 જૂનથી 3 જુલાઈ સુધી જ્યારે રાજ્યસભાનું પ્રથમ સત્ર 27 જૂનથી 3 જુલાઈ સુધી ચાલશે. જો કે, સમાચાર આવ્યા હતા કે સંસદના પ્રથમ સત્રમાં સામાન્ય બજેટ રજૂ નહીં થાય અને તેના માટે આગામી સત્રની રાહ જોવી પડશે.