નવી દિલ્હી: કોંગ્રેસના વરિષ્ઠ નેતા પી ચિદમ્બરમે મોદી સરકાર ઉપર ગંભીર આક્ષેપ કરતા જણાવ્યું હતું કે, કેન્દ્ર સરકાર ઈંધણ પર વધુ ટેક્સ લાદીને નફો કરી રહી છે. આ સામાન્ય લોકોની કિંમતે કરવામાં આવી રહ્યું છે. કેન્દ્ર સરકાર દ્વારા પેટ્રોલ અને ડીઝલની કિંમતો “કૃત્રિમ રીતે” ઊંચી રાખવામાં આવી છે, જે મોંઘવારી વધવાનું એક કારણ છે.
ભૂતપૂર્વ કેન્દ્રીય પ્રધાને જણાવ્યું હતું કે પેટ્રોલના ભાવ 2010 અને 2014 વચ્ચે નિયંત્રિત કરવામાં આવ્યા હતા, જોકે સપ્ટેમ્બર 2014 થી ‘નિયંત્રણ‘ સુધારણા બંધ થઈ ગઈ છે. ચિદમ્બરમે કહ્યું કે, “2014 અને 2021 વચ્ચે ક્રૂડ ઓઈલના ભાવ પ્રતિ બેરલ 60 ડોલરથી નીચે હતા, તેમ છતાં સરકારે પેટ્રોલ અને ડીઝલનો ઉપયોગ કરતા લોકોને ક્રૂડ ઓઈલના ભાવમાં ઘટાડાનો લાભ આપ્યો નથી.”
તેમણે કહ્યું કે 2022માં જ્યારે રશિયાએ યુક્રેન પર હુમલો કર્યો ત્યારે ક્રૂડ ઓઈલની કિંમતમાં જોરદાર વધારો થયો હતો, પરંતુ હવે તે ઘટીને 75 યુએસ ડોલર થઈ ગયો છે. ચિદમ્બરમે કહ્યું, “તે સ્પષ્ટ છે કે સરકાર લોકોના ખર્ચે ઊંચા કર અને સેસ દ્વારા નફો કમાઈ રહી છે,” તેમણે આરોપ લગાવ્યો. “ઊંચી મોંઘવારીનું એક કારણ પેટ્રોલ અને ડીઝલના કૃત્રિમ રીતે ઊંચા ભાવ છે,” તેમ પૂર્વ કેન્દ્રીયમંત્રી ચિદમ્બરમે જણાવ્યું હતું.
અત્રે ઉલ્લેખનીય છે કે, પેટ્રોલ-ડિઝલના ભાવમાં થયેલા વધારાને પગલે લોકોના ખિસ્સાને અસર થઈ છે. બીજી તરફ કોંગ્રેસ સહિતના વિપક્ષી દળો ઈંધણના ભાવમાં થયેલા વધારાને પગલે કેન્દ્ર સરકારને ઘેરવાના પ્રયાસો કરી રહ્યાં છે.