અમદાવાદઃ રાજ્ય સરકાર દ્વારા મેડિકલ કોલેજોમાં આગામી નવા શૈક્ષણિક વર્ષથી ગુજરાતી ભાષામાં અભ્યાસ કરવાની જાહેરાત કરવામાં આવી છે. આ નિર્ણયનો અમલ પ્રવેશ પ્રક્રિયા દરમિયાન જ કરવામાં આવશે. વિદ્યાર્થીઓને પ્રવેશ દરમિયાન ગુજરાતી કે અંગ્રેજી માધ્યમમાં અભ્યાસ કરવો છે તેનો વિકલ્પ આપવામાં આવશે. જોકે, માર્કશીટમાં માધ્યમનો ઉલ્લેખ કરવામાં આવશે નહીં.
સૂત્રોના જણાવ્યા મુજબ ગુજરાતમાં નવી એજ્યુકેશન પોલિસી અંતર્ગત વિદ્યાર્થીઓ માતૃભાષામાં અભ્યાસ કરી શકે તે માટે ઇજનેરી-મેડિકલ સહિતના તમામ પુસ્તકોને ગુજરાતીમાં તૈયાર કરવામાં આવી રહ્યા છે. ઇજનેરીના પુસ્તકો ગુજરાતીમાં તૈયાર કરવા માટે એક અલગ કમિટીની રચના કરવામાં આવી છે. આ જ રીતે મેડિકલના પુસ્તકોને ગુજરાતીમાં તૈયાર કરવા માટે જુદી જુદી મેડિકલ કોલેજના ડીનના અધ્યક્ષસ્થાને અલગ કમિટીની રચના કરવામાં આવી છે. સરકાર દ્વારા કરાયેલી જાહેરાતનો અમલ મેડિકલ કોલેજમાં કેવી રીતે કરવો તે અંગે તપાસ કરતા એવી વિગતો બહાર આવી છે કે, પ્રવેશ પ્રક્રિયા દરમિયાન વિદ્યાર્થીઓને વિકલ્પ આપવામાં આવશે. એટલે કે આર્ટસ, કોમર્સ અને સાયન્સ કોલેજોની જેમ વિદ્યાર્થીઓએ પ્રવેશ સમયે જ ગુજરાતી માધ્યમમાં અભ્યાસ કરવો કે અંગ્રેજીમાં તે નક્કી કરવાનું રહેશે. દરેક વિષયના કન્ટેન્ટ ગુજરાતીમાં તૈયાર કરી દેવામાં આવ્યા છે. વિકલ્પ આપ્યા પછી વિદ્યાર્થીઓને તેના પુસ્તકો મળી શકશે. જોકે, વિદ્યાર્થીઓને અભ્યાસ બાદ આપવામાં આવતી માર્કશીટમાં ગુજરાતી કે અંગ્રેજી માધ્યમ એવો કોઇ ઉલ્લેખ કરવામાં નહીં આવે. એટલે કે વિદ્યાર્થીઓ પોતાની અનુકુળતા પ્રમાણે ગુજરાતી કે અંગ્રેજી ભાષાની પસંદગી કરી શકશે.
સૂત્રોએ વધુમાં જણાવ્યું હતું કે, હાલ મેડિકલના પહેલાં વર્ષના પુસ્તકોને ગુજરાતીમાં તૈયારી કરવાની કામગીરી પૂરી કરી દેવામાં આવી છે. મેડિકલ ટર્મિનોલોજીમાં અમુક શબ્દો ગુજરાતીમાં ન હોય તો તેવી સ્થિતિમાં તેને બોલચાલની ભાષામાં જે શબ્દનો ઉપયોગ થતો હોય તેને યથાવત્ રાખવાનું નક્કી કરવામાં આવ્યું છે. આમ, આગામી વર્ષે મેડિકલમાં પ્રવેશ માટે થનારી કાર્યવાહી દરમિયાન પ્રવેશ સમિતિ સાથે ટાઇઅપ કરીને પ્રવેશની કાર્યવાહીમાં જ વિદ્યાર્થીઓને માધ્યમ પસંદ કરવાનો વિકલ્પ આપી દેવામાં આવશે. મહત્ત્વની વાત એ કે હાલમાં ઇજનેરીમાં ગુજરાતી માધ્યમમાં અભ્યાસ કરવાનો પ્રારંભ કરવામાં આવ્યો છે.
