બલૂચિસ્તાન પ્રાંતમાં કોલસાની ખાણ પર બંદૂકધારીઓનો હુમલો, અંધાધૂંધ ગોળીબારમાં 20 લોકોના મોત
ગુરુવારે મોડી રાત્રે પાકિસ્તાનના બલૂચિસ્તાન પ્રાંતના ડુકી જિલ્લામાં કોલસાની ખાણ પર બંદૂકધારીઓએ હુમલો કર્યો હતો, જેમાં 20 ખાણિયાઓ માર્યા ગયા હતા અને સાત અન્ય ઘાયલ થયા હતા. અહેવાલો અનુસાર, બંદૂકધારીઓએ ખાણની નજીક રહેતા લોકોના ઘરોને ઘેરી લીધા અને અંધાધૂંધ ગોળીબાર શરૂ કર્યો. પોલીસ અધિકારી હુમાયુ ખાન નાસિરે જણાવ્યું હતું કે મોટાભાગના માર્યા ગયેલા અને ઘાયલ થયેલા લોકો બલૂચિસ્તાનના પશ્તુન-ભાષી વિસ્તારના હતા અને મૃતકોમાં ત્રણ અફઘાન નાગરિકો પણ હતા.
પાકિસ્તાનના બલૂચિસ્તાન પ્રાંતમાં આ હુમલો એવા સમયે થયો છે જ્યારે આગામી થોડા દિવસોમાં રાજધાની ઈસ્લામાબાદમાં એક મોટી સુરક્ષા સમિટ યોજાવા જઈ રહી છે. હજુ સુધી આ હુમલાની જવાબદારી કોઈ જૂથે લીધી નથી, પરંતુ આ વિસ્તાર લાંબા સમયથી અલગતાવાદી ગતિવિધિઓ માટે જાણીતો છે. અહીં ઘણા જૂથો પાકિસ્તાન સરકાર પર તેલ અને ખનિજથી સમૃદ્ધ બલૂચિસ્તાનના સંસાધનોનું અયોગ્ય રીતે શોષણ કરવાનો આરોપ લગાવે છે.
બલૂચિસ્તાન પ્રાંત ઘણા સમયથી અલગતાવાદી અને આતંકવાદી ગતિવિધિઓને કારણે અસ્થિરતા અનુભવી રહ્યો છે. આ હુમલો તાજેતરના સમયમાં આ પ્રદેશની સૌથી ઘાતક ઘટનાઓમાંની એક છે. આ પહેલા સોમવારે બલૂચ લિબરેશન આર્મી (BLA)એ પાકિસ્તાનના સૌથી મોટા એરપોર્ટની બહાર ચીની નાગરિકો પર થયેલા હુમલાની જવાબદારી લીધી હતી. પાકિસ્તાનમાં હજારો ચીની નાગરિકો કામ કરે છે, જેઓ બેઇજિંગના અબજ ડોલરના બેલ્ટ એન્ડ રોડ પ્રોજેક્ટ સાથે જોડાયેલા છે.
