હરિયાણા ચૂંટણી પરિણામો: પ્રારંભીક વલણમાં ભાજપ 48 બેઠકો ઉપર આગળ, કોંગ્રેસ બહુમતથી દૂર
ચંદીગઢઃ હરિયાણામાં વિધાનસભા ચૂંટણી માટે મંગળવારે જાહેર થયેલી મત ગણતરીના પ્રારંભિક વલણોમાં, ભારતીય જનતા પાર્ટી (BJP) 48 બેઠકો પર આગળ છે જ્યારે કોંગ્રેસ 33 બેઠકો પર આગળ છે. ચૂંટણી પંચની વેબસાઈટ પર ઉપલબ્ધ લેટેસ્ટ ડેટા પરથી આ માહિતી મળી છે. સવારે 8 વાગ્યાથી મતગણતરી શરૂ થઈ ત્યારથી રાજ્યમાં ભાજપ અને કોંગ્રેસ વચ્ચે જોરદાર મુકાબલો ચાલી રહ્યો છે. પ્રારંભિક વલણોએ કોંગ્રેસને ભાજપ કરતાં આગળ દર્શાવ્યું હતું પરંતુ શાસક પક્ષે પાછળથી તીવ્ર લીડ મેળવી હતી. ચૂંટણી પંચની વેબસાઈટ પર સવારે 10.20 વાગ્યે ઉપલબ્ધ માહિતી અનુસાર, ભાજપ 48 બેઠકો પર અને કોંગ્રેસ 34 બેઠકો પર આગળ છે. 90 સભ્યોની હરિયાણા વિધાનસભામાં બહુમતીનો આંકડો 46 છે.
રાજ્યના 22 જિલ્લાના 93 કેન્દ્રો પર કડક સુરક્ષા વચ્ચે તમામ 90 વિધાનસભા બેઠકો માટે મતગણતરી સવારે 8 વાગ્યે શરૂ થઈ હતી. ચૂંટણી પંચ દ્વારા ઉપલબ્ધ પ્રારંભિક વલણો અનુસાર, ભારતીય રાષ્ટ્રીય લોક દળ (INLD) અને અપક્ષ ઉમેદવારો દરેક એક બેઠક પર આગળ છે. ચૂંટણી પંચની વેબસાઈટ પર અગાઉ ઉપલબ્ધ વલણો અનુસાર કોંગ્રેસ 18 બેઠકો પર આગળ હતી જ્યારે ભાજપ 14 બેઠકો પર આગળ હતું. કુરુક્ષેત્ર જિલ્લાની લાડવા સીટ પરથી મુખ્યમંત્રી નાયબ સિંહ સૈની 732 મતોથી આગળ છે. પ્રારંભિક વલણો અનુસાર, ભૂતપૂર્વ મુખ્ય પ્રધાન ભૂપિન્દર સિંહ હુડ્ડા રોહતકમાં તેમની ગઢી સાંપલા-કિલોઈ બેઠક પરથી 11,099 મતોના માર્જિનથી આગળ છે.
કોંગ્રેસની વિનેશ ફોગાટ જીંદની જુલાના બેઠક પરથી હરીફ ભાજપના યોગેશ કુમારથી 2,128 મતોથી પાછળ છે. હરિયાણાના મુખ્ય ચૂંટણી અધિકારી પંકજ અગ્રવાલે જણાવ્યું કે મતગણતરી કેન્દ્રો પર ત્રણ સ્તરીય સુરક્ષા વ્યવસ્થા કરવામાં આવી છે. ઘણા ‘એક્ઝિટ પોલ’ (પ્રી-રિઝલ્ટ સર્વે) એ હરિયાણામાં કોંગ્રેસની જીતની આગાહી કરી છે. રાજ્યમાં કુલ 67.90 ટકા મતદાન નોંધાયું છે. જો કે, ભાજપે દાવો કર્યો છે કે તે રાજ્યમાં સતત ત્રીજી વખત સત્તામાં આવશે.
