અમદાવાદઃ ગુજરાત હાઈકોર્ટે ફિશરીઝ કૌભાંડમાં રાજ્ય સરકારના બે ભૂતપૂર્વ મંત્રી પુરૂષોત્તમ સોલંકી અને દિલીપ સંઘાણીની બિનતહોમત છોડી મૂકવા માટેની ડિસ્ચાર્જ અરજી ફગાવી દીધી છે. બંને ભૂતપૂર્વ મંત્રીએ અરજીમાં કથિત 400 કરોડના મત્સ્યપાલન કૌભાંડ અંગે એન્ટી કરપ્શન બ્યુરો (એસીબી)એ દાખલ કરેલા કેસમાંથી બિનતહોમત છોડી મૂકવાની માગ કરી હતી. ગાંધીનગરની સ્પેશિયલ એન્ટી કરપ્શન કોર્ટે 12 માર્ચ 2021ના રોજ બિનતહોમત છોડી મૂકવાનો ઇનકાર કર્યા બાદ રાજ્યના ભૂતપૂર્વ કેબિનેટ મંત્રી દિલીપ સંઘાણી, ભૂતપૂર્વ મંત્રી પુરૂષોત્તમ સોલંકી તથા અન્ય એક આરોપી અરૂણકુમાર સુતરિયાએ હાઈકોર્ટમાં અરજી કરી હતી.
રાજ્યમાં એક સમયે ભારે ચર્ચાસ્પદ બનેલા 400 કરોડ રૂપિયાના ફિશરીઝ કૌભાંડમાં એસીબીએ પૂર્વ મંત્રી પરશોત્તમ સોલંકી અને દિલીપ સંઘાણી સામે એસીબીએ કેસ કર્યો હતો. બન્ને પૂર્વ મંત્રીઓ સામે 58 જળાશયોના ફિશિંગ કોન્ટ્રાક્ટ ટેન્ડર પ્રક્રિયા વગર જ આપી દેવાયાનો આરોપ મુકાયો હતો. આ પહેલાં તપાસ રિપોર્ટને આધારે નીચલી કોર્ટે કહ્યું હતું કે, આરોપીઓ વિરૂદ્ધ પ્રથમ દૃષ્ટિએ ગુનો હોવાનું જણાય છે. નીચલી કોર્ટે સાત આરોપીઓ દ્વારા કરાયેલી ડિસ્ચાર્જ અરજીને ફગાવી દેતાં કહ્યું હતું કે, કોર્ટને આ આરોપો પાયાવિહોણા લાગતા નથી. આ સાતમાંથી ત્રણ આરોપીએ નીચલી કોર્ટના આદેશને હાઈકોર્ટમાં પડકાર્યો હતો, જ્યાં ફોજદારી કાર્યવાહી પર રોક લગાવી દેવામાં આવી હતી. જોકે જસ્ટિસ હેમંત પ્રચ્છકે શુક્રવારે બિનતહોમત છોડી મૂકવાની અપીલ ફગાવી દીધી હતી, જેથી હવે આ બંને મંત્રીઓ અને તેમના કર્મચારીઓ વિરૂદ્ધનો કેસ આગળ વધવાનો માર્ગ મોકળો થઈ ગયો છે. જોકે હાઈ કોર્ટે ચાર મહિના સુધી સ્ટે લંબાવ્યો છે. આ કેસમાં ફરિયાદીએ ગેરરીતિઓ પકડી પાડવા માટે હાઇકોર્ટની દરમિયાનગીરીની માગણી કરી હતી.
આ કેસમાં અરજદાર ઇશાક મરાડિયાએ સોલંકીના મત્સ્યપાલન મંત્રી તરીકેના કાર્યકાળ દરમિયાન રદ કરાયેલા ફિશિંગ કોન્ટ્રાક્ટ્સ અને કથિત અનિયમિતતાઓને ઉજાગર કરવા માટે હાઈકોર્ટના હસ્તક્ષેપની માગ કરી છે. મંત્રીઓ વિરૂદ્ધ કેસ ચલાવવા રાજ્યપાલની સંમતિ લેવા માટે મરાડિયાએ લાંબી કાનૂની લડત લડવી પડી હતી. અંતે સોલંકી, સંઘાણી અને અન્ય લોકો સામે રાજ્યનાં 58 જળાશયોના ફિશિંગ કોન્ટ્રાક્ટ્સ કોઈ ટેન્ડર પ્રક્રિયા વિના સહકારી જૂથોને આપવાનો આરોપ લગાવાયો હતો. તેમની સામે પ્રીવેન્શન ઓફ કરપ્શન એક્ટ અને ઇન્ડિયન પિનલ કોડ હેઠળ આરોપ લગાવાયા હતા.