અમદાવાદ: શાળામાં બાળકો ભણતરની સાથે સંસ્કારોનું સિંચન કરે તે માટે શાળાઓમાં પ્રતિદિન શિક્ષણ કાર્યના પ્રારંભે ગીતાના શ્લોકનું પઠન કરાશે. અમદાવાદ જિલ્લાની 600 જેટલી શાળામાં આ નવતર પ્રયોગનો પ્રારંભ કરાશે, વિદ્યાર્થી ઓડિયો વિડિયોના માધ્યમથી ગીતાના શ્લોકનું પઠન કરશે.
ગુજરાતમાં શિક્ષણ વિભાગ દ્વારા ગીતાના પાઠનો અભ્યાસક્રમમાં સમાવેશ કરવામાં આવ્યો છે. પરંતુ હવે તેની સાથે અમદાવાદ ગ્રામ્ય જિલ્લા શિક્ષણાધિકારી દ્વારા એક નવતર અભિગમ અપનાવ્યો છે. અમદાવાદ ગ્રામ્ય વિસ્તારની તમામ શાળાઓમાં આયોજિત પ્રાર્થનામાં વર્ષ દરમિયાન ગીતાના 51 શ્લોકોનો પણ સમાવેશ કરવામાં આવ્યો છે.
અમદાવાદ ગ્રામ્ય જિલ્લા શિક્ષણ અધિકારીએ જણાવ્યુ હતું કે, શ્રીમદ ગીતા પ્રકલ્પ વિદ્યાર્થીઓને ગીતા દ્વારા તેમના વ્યક્તિત્વ વિકાસમાં વધારો કરવા અને વિદ્યાર્થીઓનું મનોબળ મજબૂત કરવાના હેતુથી તૈયાર કરવામાં આવ્યો છે. વિદ્યાર્થીઓ સમજી શકે તે માટે પાંચ મિનિટનો વીડિયો બનાવવામાં આવ્યો છે. અત્યાર સુધીમાં ત્રણ વીડિયો બનાવવામાં આવ્યા છે. વિદ્યાર્થીઓ એક અઠવાડિયામાં તેમના જીવનમાં પરિવર્તન લાવી શકે તે માટે એક પ્રવૃત્તિ પણ તૈયાર કરવામાં આવી છે. આનો અમલ કરવા માટે શાળાના પ્રાર્થના સમય દરમિયાન દરરોજ પાંચ મિનિટ ફાળવવાનું કહેવામાં આવ્યું છે.
ગુજરાત વિધાનસભામાં મહિનાઓ પહેલા એક ઠરાવ રજૂ કરવામાં આવ્યો હતો જેમાં ભગવદ ગીતાને સરકારી શાળાઓમાં અભ્યાસક્રમનો ભાગ બનાવવાની માંગ કરવામાં આવી હતી. હવે અમદાવાદની 600 થી વધુ શાળાઓ હિંદુ ધર્મના ગ્રંથ ગીતામાંથી ભણાવવાની દિશામાં પગલાં લેવા જઈ રહી છે. ગીતાના શ્લોકો પર આધારિત વિડિયો પાઠ આ અઠવાડિયાથી અમદાવાદ જિલ્લાની શાળાઓમાં સવારની પ્રાથનામાં સમાવેશ કરાયો છે. ગુજરાતના શિક્ષણ મંત્રી પ્રફુલ પાનશેરિયાએ અમદાવાદમાં એક કાર્યક્રમમાં ‘વિદ્યાર્થીઓ શ્રીમદ ભગવદ ગીતાના જીવન માર્ગદર્શક બને છે’ નામનો પ્રોજેક્ટ લોન્ચ કર્યો હતો.
ગુજરાત શિક્ષણ વિભાગના આ નિર્ણયનો અમલ કરવા માટે અમદાવાદ જિલ્લા શિક્ષણ કચેરી (ગ્રામ્ય) એ ઓડિયો વિઝ્યુઅલ લેસન તૈયાર કર્યું છે. 600 માધ્યમિક અને ઉચ્ચતર માધ્યમિક શાળાઓમાં આ ભણાવવામાં આવશે. આ માટેનો પરિપત્ર લોન્ચ થયાના એક-બે દિવસ બાદ અમદાવાદ જિલ્લાની તમામ શાળાઓને જારી કરવામાં આવશે. આ પગલું રાષ્ટ્રીય શિક્ષણ નીતિ (NEP) 2020 અને રાજ્ય સરકારની પહેલ હેઠળ લેવામાં આવ્યું છે.
શિક્ષણના અધિકારીઓએ જણાવ્યું હતું કે ભગવદ ગીતાના 51 શ્લોકો દ્વારા, ચારિત્ર્ય નિર્માણ, વિક્ષેપો પર નિયંત્રણ, તણાવ વ્યવસ્થાપન અને ખાદ્ય વ્યવસ્થાપન, આધુનિક જીવનશૈલીના પડકારો સાથે સંબંધિત અન્ય પાસાઓને વિડિઓ પાઠ દ્વારા આવરી લેવામાં આવશે આ પ્રોજેક્ટ હેઠળ આ સપ્તાહે 3,000 થી વધુ શિક્ષકોની તાલીમ પણ અપાશે. (File photo)