અમદાવાદઃ ગુજરાત માધ્યમિક અને ઉચ્ચતર માધ્યમિક શિક્ષણ બોર્ડ દ્વારા ધો.10માં નાપાસ થયેલા વિદ્યાર્થીઓને શાળામાં પુનઃ પ્રવેશઆપવાનો નિયમ રદ કર્યો છે. અગાઉના નિયમ અનુસાર બોર્ડ દ્વારા નાપાસ થયેલા વિદ્યાર્થીઓને શાળાઓમાં પુનઃ પ્રવેશ ફાળવતો હતો. પરંતુ તાજેતરમાં બોર્ડે દ્વારા આ જોગવાઈ રદ કરવામાં આવી છે.
સૂત્રોના જણાવ્યા મુજબ પોરબંદરની એક સ્કૂલ દ્વારા ધો.10માં નાપાસ થયેલા 20 જેટલા વિદ્યાર્થીઓના પ્રવેશ અંગે રજૂઆત કરી હતી. ત્યારે બોર્ડ દ્વારા જોગવાઈ જ રદ કરી દેવામાં આવી હોવાની માહિતી આપી હતી. બોર્ડના આ નિર્ણય સામે સંચાલકોમાં ભારે રોષ ફેલાયો છે. આ મુદ્દે સંચાલક મંડળ દ્વારા સરકારમાં રજૂઆત કરવામાં આવશે અને ત્યારબાદ પણ જો નિરાકરણ નહીં આવે તો હાઈકોર્ટમાં પડકારવાનું પણ નક્કી કરાયું છે. શિક્ષણ બોર્ડની ધો.10ની પરીક્ષામાં નાપાસ થયેલા વિદ્યાર્થીઓ શાળામાં પુનઃ પ્રવેશ મેળવવા માંગતા હોય તો તે અંગે બોર્ડ દ્વારા જોગવાઈ કરવામાં આવેલી હતી. જેમાં બોર્ડ દ્વારા લેવામાં આવેલી ધો.10ની આખરી પરીક્ષામાં નાપાસ થયા બાદ નોંધાયેલી શાળામાં ફરી જોડાનાર 10થી વધુ નહીં એટલા વિદ્યાર્થીઓને અધિકારીની પરવાનગીથી ધો.10ના પ્રત્યેક વર્ગમાં પ્રવેશ આપી શકાશે તેમ જણાવેલું હતું. જોકે, બોર્ડ દ્વારા તાજેતરમાં આ જોગવાઈ શાળાઓને અંધારામાં રાખીને બંધ કરી દીધી હોવાનું કહેવાય છે. પોરબંદરની એક સ્કૂલ દ્વારા ધો.10ના માર્ચ-2022ની પરીક્ષામાં નાપાસ થયેલા 20 જેટલા વિદ્યાર્થીઓને નિયમિત પ્રવેશ આપવા માટે રજૂઆત કરી હતી. જેના પગલે બોર્ડ દ્વારા પુનઃ પ્રવેશની જોગવાઈ રદ કરવામાં આવી હોવાની સ્પષ્ટતા કરી હતી.
સૂત્રોએ વધુમાં જણાવ્યું હતું કે, શાળાઓ માટે ગ્રાન્ટ નીતિ બનાવવામાં આવી ત્યારે ગ્રાન્ટ ઈન એઈડ કોડ અમલમાં આવ્યા હતા ત્યારે પણ જૂની પરીક્ષાના નાપાસ થયેલા વિદ્યાર્થીઓને 10 ટકા સુધી એટલે કે, 60ના વર્ગમાં 6 વિદ્યાર્થીઓ સુધી પુનઃ પ્રવેશ આપી શકાય તેવી જોગવાઈ કરવામાં આવી હતી. ડિસેમ્બર-2021 પહેલા આ જોગવાઈ ગુજરાત માધ્યમિક શિક્ષણ વિનિયમો 1974મા પણ હતી. ત્યારબાદ બોર્ડમાં ચૂંટાયેલુ બોર્ડ ન હતું, માત્ર અધિકારીઓ શાસિત બોર્ડ હતું ત્યારે નાપાસ થયેલા વિદ્યાર્થીઓને પુનઃ પ્રવેશની જોગવાઈ રદ કરવામાં આવી હતી. દરમિયાન સંચાલક મંડળના પ્રમુખ ભાસ્કર પટેલે જણાવ્યું હતું કે, આ નિર્ણયનો અમે વિરોધ કરીએ છીએ, તેની પાછળના કારણો જોઈએ તો સૌપ્રથમ નાપાસ વિદ્યાર્થી શાળામાં પૂર્ણ સમય શિક્ષણ મેળવી શકે જેથી ગરીબ મા-બાપના બાળકોને ટ્યૂશનની મોટી રકમ ભરવી ન પડે તેમ હતું. જોકે, જોગવાઈ રદ કરતા હવે તેમને ટ્યૂશન રાખવું પડશે.