ભારતઃ 1.45 લાખ કરોડના 10 સૈન્ય પ્રોજેક્ટને કેન્દ્ર સરકારે મંજૂરી આપી
- નૌકાદળના પ્રોજેક્ટ 17 બ્રાવો હેઠળ સાત નવા યુદ્ધ જહાજોના સંપાદનનો પણ સમાવેશ
- આર્મી T-72ને સ્વદેશી FRCV સાથે બદલવાની યોજના બનાવી રહી છે
નવી દિલ્હીઃ કેન્દ્ર સરકારે દેશની સંરક્ષણ પ્રણાલીને આધુનિક બનાવવા માટે ત્રણ સેવાઓ માટે રૂ. 1.45 લાખ કરોડના મૂલ્યના 10 મૂડી સંપાદન પ્રસ્તાવોને મંજૂરી આપી છે. સંરક્ષણ મંત્રાલય ભારતીય નૌકાદળ માટે સાત અદ્યતન ફ્રિગેટ્સનું નિર્માણ અને ભારતીય સેનાની T-72 ટેન્કને આધુનિક ફ્યુચર રેડી કોમ્બેટ વ્હીકલ (FRCVs) સાથે બદલવાની દરખાસ્ત સહિત મોટા પ્રોજેક્ટ્સ શરૂ કરવા તૈયાર છે.
સંરક્ષણ અધિકારીઓના જણાવ્યા અનુસાર, લડાયક વાહનો, એર ડિફેન્સ ફાયર કંટ્રોલ રડાર, ડોર્નિયર-228 એરક્રાફ્ટ, નેક્સ્ટ જનરેશન ફાસ્ટ પેટ્રોલ અને ઓફશોર પેટ્રોલ વેસલ્સ ખરીદવાના છે. આમાં ભારતીય નૌકાદળના પ્રોજેક્ટ 17 બ્રાવો હેઠળ સાત નવા યુદ્ધ જહાજોના સંપાદનનો પણ સમાવેશ થાય છે, જે હાલમાં નિર્માણાધીન નીલગીરી વર્ગના ફ્રિગેટ્સ પછી ભારતમાં બાંધવામાં આવેલ સૌથી અદ્યતન સ્ટીલ્થ ફ્રિગેટ હશે. DAC તરફથી મંજૂરી મળ્યા બાદ, ‘મેક ઈન ઈન્ડિયા’ પહેલ હેઠળ ખાનગી ક્ષેત્રના શિપયાર્ડ સહિત ભારતીય શિપયાર્ડને લગભગ રૂ. 70 હજાર કરોડના ટેન્ડર જાહેર કરવામાં આવે તેવી અપેક્ષા છે. કેટેગરી A શિપયાર્ડ્સ મઝાગોન ડોક શિપબિલ્ડર્સ, ગાર્ડન રીચ શિપબિલ્ડર્સ એન્ડ એન્જિનિયર્સ લિમિટેડ, ગોવા શિપયાર્ડ લિમિટેડ અને લાર્સન એન્ડ ટુબ્રો વગેરે ટેન્ડરમાં સામેલ થશે.
હાલમાં, મઝાગોન ડોક શિપબિલ્ડર્સ અને ગાર્ડન રીચ શિપબિલ્ડર્સ પ્રોજેક્ટ 17A (નીલગીરી-વર્ગ) હેઠળ ફ્રિગેટ્સનું નિર્માણ કરી રહ્યાં છે, જેમાં ચાર ફ્રિગેટ્સ MDL ખાતે અને ત્રણ GRSE ખાતે બાંધવામાં આવી રહ્યાં છે. આર્મી T-72ને સ્વદેશી FRCV સાથે બદલવાની યોજના બનાવી રહી છે. ભારતીય સેનાની રશિયન મૂળની T-72 ટેન્કને 1,700 FRCV સાથે બદલવાના પ્રસ્તાવ પર પણ બેઠકમાં ચર્ચા કરવામાં આવી હતી. ભારતીય વિક્રેતાઓએ 60 ટકાથી વધુ સ્વદેશી સામગ્રી સાથે ટેન્ક બનાવવાની જરૂર પડશે અને મુખ્ય ખેલાડીઓ ભારત ફોર્જ અને લાર્સન એન્ડ ટુબ્રો છે. ભારતીય સેનાએ એફઆરસીવી પ્રોજેક્ટને બહુવિધ તબક્કામાં પૂર્ણ કરવાનું લક્ષ્ય રાખ્યું છે, જેમાં પ્રત્યેક તબક્કામાં લગભગ 600 ટેન્ક બનાવવામાં આવશે. સંરક્ષણ પ્રધાન રાજનાથ સિંહની અધ્યક્ષતામાં મંગળવારે સાઉથ બ્લોકમાં યોજાયેલી ડિફેન્સ એક્વિઝિશન કાઉન્સિલ (ડીએસી)ની બેઠકમાં ચીફ ઑફ ડિફેન્સ સ્ટાફ, ત્રણ સેનાના વડા, સંરક્ષણ સચિવ અને અન્ય ટોચના અધિકારીઓ હાજર રહ્યા હતા.
