નવી દિલ્હીઃ ભારતની મુલાકાતે આવેલા અમેરિકી નાણામંત્રી જેનેટ યેલેને કહ્યું છે કે, ભારત વિશ્વની સૌથી ઝડપથી વિકસતી અર્થવ્યવસ્થાઓમાંની એક છે. ઉત્તર પ્રદેશના નોઈડામાં આયોજિત એક કાર્યક્રમમાં તેમણે આ વાત કહી હતી. યેલેને કહ્યું કે, યુએસ ટ્રેઝરી સેક્રેટરી તરીકે આ મારી પ્રથમ ભારત મુલાકાત છે. હું અહીં આવીને ખુશ છું, કારણ કે ભારત તેની આઝાદીના 75માં વર્ષની ઉજવણી કરી રહ્યું છે અને G20 ના પ્રમુખ બનવાની તૈયારી કરી રહ્યું છે. રાષ્ટ્રપતિ બિડેને કહ્યું છે તેમ, ભારત અમેરિકાના અડગ ભાગીદારોમાંનું એક છે.
યુએસ નાણામંત્રીએ સ્વીકાર્યું કે, ભારત વિશ્વમાં સૌથી ઝડપથી વિકસતી મોટી અર્થવ્યવસ્થાઓમાંની એક છે. અમે રોગચાળાની અસરનો સામનો કરી રહ્યા છીએ અને યુક્રેનમાં રશિયન પ્રમુખ પુતિનના અસંસ્કારી યુદ્ધ દ્વારા સર્જાયેલી પરિસ્થિતિઓના વ્યાપક આર્થિક સંકટનો પણ સામનો કરી રહ્યા છીએ. તેમણે કહ્યું કે ભારત અને અમેરિકા વચ્ચેનો દ્વિપક્ષીય વેપાર ગયા વર્ષે સર્વકાલીન ઉચ્ચ સ્તરે પહોંચ્યો હતો. અમને આશા છે કે તેમાં વધુ વધારો થશે.
તેમણે વધુમાં કહ્યું હતું કે, અમારા લોકો અને કંપનીઓ એકબીજા પર નિર્ભર છે. ભારત સંદેશાવ્યવહાર માટે વારંવાર WhatsAppનો ઉપયોગ કરે છે. ઘણી અમેરિકન કંપનીઓ ઇન્ફોસિસ સાથે કામ કરવા પર આધાર રાખે છે. ભારતીય મૂળના પ્રતિભાશાળી લોકો ગૂગલ, માઇક્રોસોફ્ટ અને અન્ય મોટી અમેરિકન કંપનીઓમાં ઉચ્ચ હોદ્દા પર છે. અમેરિકી નાણામંત્રીએ કહ્યું કે લોકશાહી લોકોનું ભલું કરે છે અને વિશ્વ અર્થવ્યવસ્થાનો માર્ગ ભારત અને અમેરિકા સાથે મળીને કરેલા કામોથી નક્કી થશે. ઈન્ડો-પેસિફિક ક્ષેત્રની સમૃદ્ધિ અને સુરક્ષા માટે પણ આ સાચું છે. ભારત-અમેરિકા સંબંધો આગળ વધશે.
(PHOTOF-FILE)
