અમદાવાદ:ઓસ્ટ્રેલિયાના વડા પ્રધાન એન્થોની એલ્બનીઝસે બુધવારે સાંજે જાહેરાત કરી હતી કે તેમના દેશ અને ભારત સરકારે ઓસ્ટ્રેલિયા-ભારત શૈક્ષણિક લાયકાત માન્યતા પદ્ધતિને અંતિમ સ્વરૂપ આપ્યું છે. એલ્બનીઝએ એક કાર્યક્રમમાં સત્તાવાર રીતે જાહેરાત કરી હતી કે,ઓસ્ટ્રેલિયાની ડીકિન યુનિવર્સિટી ગિફ્ટ સિટી, ગાંધીનગર, ગુજરાત ખાતે આંતરરાષ્ટ્રીય શાખા કેમ્પસ સ્થાપશે.
તેમણે કહ્યું કે અમારા દ્વિપક્ષીય શિક્ષણ સંબંધોમાં નોંધપાત્ર પ્રગતિ થઈ છે.મને તમને જણાવતા આનંદ થાય છે કે અમે ઓસ્ટ્રેલિયા-ભારત એજ્યુકેશન ક્વોલિફિકેશન રેકગ્નિશન મિકેનિઝમને અંતિમ સ્વરૂપ આપ્યું છે.
PM એલ્બનીઝએ કહ્યું કે નવી મિકેનિઝમનો અર્થ એ છે કે જો તમે ભારતીય વિદ્યાર્થી છો અને ઓસ્ટ્રેલિયામાં અભ્યાસ કરી રહ્યા છો અથવા અભ્યાસ કર્યો છે, તો જ્યારે તમે ઘરે પાછા ફરો ત્યારે તમારી મહેનતની ડિગ્રીને માન્યતા આપવામાં આવશે.જો તમે ઓસ્ટ્રેલિયામાં મોટા ભારતીય ડાયસ્પોરા જૂથના સભ્ય છો,તો તમે વધુ વિશ્વાસ અનુભવશો કે તમારી ભારતીય લાયકાતને ઓસ્ટ્રેલિયામાં ઓળખવામાં આવશે.
એલ્બનીઝએ કહ્યું કે ભારત દ્વારા કોઈપણ દેશ સાથે સ્વીકારવામાં આવેલી આ સૌથી વ્યાપક અને મહત્વાકાંક્ષી વ્યવસ્થા છે.આનાથી ભારતીય વિદ્યાર્થીઓને નવીન અને વધુ સુલભ શિક્ષણ પ્રદાન કરવા માટે ઓસ્ટ્રેલિયન શિક્ષણ પ્રદાતાઓ માટે વ્યવસાયની તકોનો માર્ગ મોકળો થયો. આ શૈક્ષણિક સંસ્થાઓને એકબીજા સાથે ભાગીદારી કરવાની નવી રીતો પર વિચાર કરવા માટે મજબૂત પાયો પૂરો પાડે છે.
વડાપ્રધાને ઓસ્ટ્રેલિયામાં અભ્યાસ કરવા માંગતા ભારતીય વિદ્યાર્થીઓ માટે નવી શિષ્યવૃત્તિની પણ જાહેરાત કરી હતી. તેમણે કહ્યું કે મને નવી શિષ્યવૃત્તિની જાહેરાત કરતાં આનંદ થાય છે. આ ભારતીય વિદ્યાર્થીઓ માટે ઓસ્ટ્રેલિયામાં ચાર વર્ષ સુધી અભ્યાસ કરવા માટે છે.શિષ્યવૃત્તિ એ વ્યાપક મિત્રતા કાર્યક્રમનો એક ભાગ છે જે ઓસ્ટ્રેલિયા અને ભારત વચ્ચે સાંસ્કૃતિક, શૈક્ષણિક અને સામુદાયિક સંબંધોને પ્રોત્સાહન આપવા માંગે છે.આ પ્રસંગે ગુજરાતના મુખ્યમંત્રી ભૂપેન્દ્ર પટેલ અને રાજ્યપાલ આચાર્ય દેવવ્રત પણ ઉપસ્થિત રહ્યા હતા.