ભારતની જેલોમાં ગાંજો અને સેલફોનની સૌથી વધારે તસ્કરી, રિપોર્ટમાં ખુલાસો
નવી દિલ્હીઃ ગૃહ મંત્રાલયની સંસદીય સ્થાયી સમિતિના અહેવાલમાં ખુલાસો થયો છે કે, ભારતની જેલોમાં મોટાભાગે ગાંજો અને સેલફોનની દાણચોરી થાય છે. સંસદીય સ્થાયી સમિતિના 245મા રિપોર્ટમાં જેલની સ્થિતિ, સુધારા અને માળખાગત સુવિધાઓ અંગે માહિતી આપવામાં આવી છે. સંસદીય સમિતિએ વિવિધ રાજ્યો અને કેન્દ્રશાસિત પ્રદેશોની સરકારો સાથે ચર્ચા કર્યા બાદ આ રિપોર્ટ તૈયાર કર્યો છે. તાજેતરમાં, જ્યારે સંસદનું વિશેષ સત્ર યોજાયું હતું, ત્યારે સત્રના છેલ્લા દિવસે ગૃહના બંને ગૃહોમાં આ અહેવાલ રજૂ કરવામાં આવ્યો હતો.
સંસદીય સમિતિના અહેવાલમાં કહેવામાં આવ્યું છે કે વિવિધ રાજ્યો અને કેન્દ્રશાસિત પ્રદેશો સાથે વાત કર્યા બાદ સમિતિને ખબર પડી કે જેલોની અંદર ગાંજા અને સેલફોનની સૌથી વધુ દાણચોરી થાય છે. તસ્કરીથી મળેલા મોબાઈલ ફોનથી ગુનેગારો જેલમાં બેઠા-બેઠા પોતાની ગેંગ ઓપરેટ કરે છે અને બહાર ગુનાહિત પ્રવૃત્તિઓને અંજામ આપે છે. રિપોર્ટમાં એવું પણ કહેવામાં આવ્યું છે કે સેલફોનના કારણે જ જેલોની અંદર ગેંગ વોરને પ્રોત્સાહન મળે છે.
રિપોર્ટમાં જેલની અંદર દાણચોરી રોકવા માટે ઈ-મીટિંગ અથવા વીડિયો કોન્ફરન્સિંગ દ્વારા જેલ અધિકારીઓની બેઠક યોજવાનું સૂચન કરવામાં આવ્યું છે. સમિતિએ એમ પણ કહ્યું હતું કે જેલ સ્ટાફ પોતે જેલોની અંદર વિવિધ સામાનની દાણચોરીમાં મદદ કરે છે. ગૃહ મંત્રાલયને આ દાણચોરીને રોકવા માટે કડક પગલાં લેવાની સલાહ આપવામાં આવી છે અને તમામ જેલો માટે પ્રમાણભૂત પ્રક્રિયાઓ નક્કી કરવાની સલાહ આપવામાં આવી છે. ડ્રોન અને સ્નિફર ડોગની મદદથી જેલોમાં દેખરેખ રાખવાની સલાહ આપવામાં આવી છે.
