મુંબઈઃ સનરાઇઝર્સ હૈદરાબાદ રોયલ ચેલેન્જર્સ બેંગ્લોરને પાછળ છોડીને એક જ ટી-20 સિરીઝમાં સૌથી વધુ સિક્સર ફટકારનારી ટીમ બની હતી. હૈદરાબાદે રવિવારે સાંજે પંજાબ કિંગ્સ સામે ઈન્ડિયન પ્રીમિયર લીગ (આઈપીએલ) 2024ની 69મી મેચમાં આ સિદ્ધિ મેળવી હતી.
અભિષેક શર્મા અને હેનરિક ક્લાસેનની મજબૂત ઇનિંગ્સના બળ પર, સનરાઇઝર્સ હૈદરાબાદે રવિવારે અહીં, રાજીવ ગાંધી ઇન્ટરનેશનલ સ્ટેડિયમમાં પંજાબ કિંગ્સ સામે પાંચ બોલ બાકી રહેતા 215 રનનો લક્ષ્યાંક હાંસલ કર્યો હતો.
હૈદરાબાદે આ મેચમાં કુલ 14 છગ્ગા ફટકાર્યા અને વર્તમાન સંસ્કરણમાં તેની છગ્ગાની સંખ્યા 160 પર પહોંચી ગઈ. જ્યારે બીજી તરફ, ફાફ ડુ પ્લેસિસની આગેવાની હેઠળની રોયલ ચેલેન્જર્સ બેંગ્લોર (આરસીબી) પાસે કુલ 157 સિક્સર છે.
ટી-20 શ્રેણીમાં સૌથી વધુ સિક્સ ફટકારનારની યાદીમાં અન્ય ટીમો ચેન્નાઈ સુપર કિંગ્સ (આઈપીએલ 2018માં 145), સરે (ટી-20 બ્લાસ્ટ 2023માં 144) અને કોલકાતા નાઈટ રાઈડર્સ (આઈપીએલ 2019માં 143) છે.
આ મેચમાં, એસઆરએચ એ ચાલુ આઈપીએલ 2024માં પોતાના નામે વધુ એક રેકોર્ડ નોંધાવ્યો. હૈદરાબાદ સ્થિત ફ્રેન્ચાઇઝીએ એક જ આઇપીએલ એડિશનમાં છ વખત સૌથી વધુ 200થી વધુ સ્કોર બનાવવાના રેકોર્ડની બરાબરી કરી હતી. આ પહેલા કલકતા નાઈટ રાઈડર્સ, મુંબઈ ઈન્ડિયન્સ અને રોયલ ચેલેન્જર્સ બેંગ્લોર પણ 6-6 વખત 200ના સ્કોરને સ્પર્શી ચૂકી છે.
મેચ વિશે વાત કરીએ તો, પીકેબીએસ એ ટોસ જીતીને પ્રથમ બેટિંગ કરવાનો નિર્ણય કર્યો. પ્રભસિમરન સિંહ (45 બોલમાં સાત ચોગ્ગા અને ચાર છગ્ગાની મદદથી 71 રન) અને રિલે રોસોવ (24 બોલમાં ત્રણ ચોગ્ગા અને ચાર છગ્ગાની મદદથી 49 રન) અને અથર્વ તાઈદે (27 બોલ,46 રન, પાંચ ફોર અને બે સિક્સ), આ ધૂવાધાર બેટિંગના કારણે, પંજાબે 20 ઓવરમાં 5 વિકેટે 214 રન બનાવ્યા હતા.
મોટા ટાર્ગેટનો પીછો કરવા ઉતરેલી હૈદરાબાદની, શરૂઆત ખરાબ રહી હતી અને ટ્રેવિસ હેડ કોઈ પણ સ્કોર વગર જ રહ્યો હતો, પરંતુ આ પછી અભિષેક શર્મા (28 બોલમાં 66 રન, પાંચ ચોગ્ગા અને છ છગ્ગા), નીતિશ કુમાર રેડ્ડી (25 બોલમાં 37 રન, એક ચોગ્ગા અને ત્રણ છગ્ગા), અને હેનરિક ક્લાસેન (26 બોલમાં 42 રન, ત્રણ ચોગ્ગા અને બે છગ્ગા)એ વિસ્ફોટક ઇનિંગ્સ રમી, અને 19.1 ઓવરમાં 6 વિકેટે 215 રન બનાવીને જીત મેળવી. અભિષેક શર્મા તેની ઝડપી અડધી સદી માટે, પ્લેયર ઓફ ધ મેચ બન્યો હતો.