IPL 2024: બે મેચના શિડ્યુઅલમાં ફેરફાર કરાયાં, જાણો કારણ…
નવી દિલ્હીઃ કોલકાતા નાઈટ રાઈડર્સ (KKR) અને રાજસ્થાન રોયલ્સ વચ્ચે 17 એપ્રિલે કોલકાતાના ઈડન ગાર્ડન્સ ખાતે રમાનાર મેચના શેડ્યૂલમાં ફેરફાર કરવામાં આવ્યો છે. હવે આ બંને ટીમો વચ્ચે આ મેચ એક દિવસ પહેલા એટલે કે 16મી એપ્રિલે રમાશે. અગાઉ આ દિવસે ગુજરાત ટાઇટન્સ અને દિલ્હી કેપિટલ્સ વચ્ચે મેચ થવાની હતી, પરંતુ KKR અને રાજસ્થાન વચ્ચેની મેચમાં ફેરફાર થતાં હવે ગુજરાત અને દિલ્હી વચ્ચેની મેચ 17 એપ્રિલે અમદાવાદના નરેન્દ્ર મોદી સ્ટેડિયમમાં જ રમાશે.
- રામ નવમીને ધ્યાનમાં રાખીને કરવામાં આવેલા ફેરફારો
રામ નવમીને ધ્યાનમાં રાખીને આ IPL મેચોના શેડ્યૂલમાં ફેરફાર કરવામાં આવ્યા છે. આ વાર્ષિક ઉત્સવ સમગ્ર દેશમાં સનાતન ધર્મને અનુસરતા લોકો દ્વારા ખૂબ જ ધામધૂમથી ઉજવવામાં આવે છે. 19 એપ્રિલથી પશ્ચિમ બંગાળમાં લોકસભાની ચૂંટણી પણ શરૂ થશે. તેને જોતા કોલકાતા પોલીસે મેચ માટે સુરક્ષા આપવામાં અસમર્થતા દર્શાવી હતી. KKR અને રાજસ્થાન વચ્ચેની મેચમાં ફેરફાર અંગે સતત અટકળો ચાલી રહી હતી. એવા અહેવાલ હતા કે કોલકાતા પોલીસ, બોર્ડ ઓફ કંટ્રોલ ફોર ક્રિકેટ ઇન ઇન્ડિયા (BCCI) અને ક્રિકેટ એસોસિએશન ઓફ બંગાળ (CAB) વચ્ચે ચર્ચા ચાલી રહી હતી, પરંતુ આખરે મેચની તારીખ બદલવાનો નિર્ણય લેવામાં આવ્યો હતો. રિપોર્ટ અનુસાર, કોલકાતા પોલીસે CAB પ્રમુખ સ્નેહાસીશ ગાંગુલીને મોકલેલા પત્રમાં લખ્યું છે કે, આ મેચ રામ નવમીના દિવસે યોજાઈ રહી છે અને ચૂંટણીના કારણે કેટલાક સુરક્ષાકર્મીઓ ત્યાં તૈનાત કરવામાં આવશે, તેથી અમે 17મી એપ્રિલના રોજ રમાનારી મેચમાં સુરક્ષા પુરી પાડવા અસમર્થ છીએ.
- ટિકિટ અંગે કોઈ નિર્ણય લેવાયો નથી
KKR-રાજસ્થાન અને ગુજરાત-દિલ્હી વચ્ચેની મેચોની તારીખમાં ફેરફારની જાહેરાત કરવામાં આવી હોવા છતાં, IPLએ હજુ સુધી સ્પષ્ટ કર્યું નથી કે આ મેચોની અગાઉથી વેચાયેલી ટિકિટોનું શું થશે.
- કાર્યક્રમની જાહેરાત બે તબક્કામાં કરવામાં આવી હતી
લોકસભા ચૂંટણીને ધ્યાનમાં રાખીને BCCIએ IPLની 17મી સિઝનનું બે તબક્કામાં શેડ્યૂલ નક્કી કર્યું હતું. શરૂઆતમાં બોર્ડે આ ટુર્નામેન્ટની 21 મેચોના શેડ્યૂલની જાહેરાત કરી હતી અને લોકસભા ચૂંટણીની તારીખોની જાહેરાત બાદ બાકીની 53 મેચોના શેડ્યૂલની જાહેરાત કરવામાં આવી હતી. શેડ્યૂલ તૈયાર કરતી વખતે, BCCI એ સંપૂર્ણ ધ્યાન રાખ્યું હતું કે હોમ અવે ફોર્મેટમાં કોઈ પણ સંજોગોમાં કોઈ સમસ્યા ન આવે. દેશમાં સાત તબક્કામાં લોકસભાની ચૂંટણી યોજાશે, જે 19 એપ્રિલથી શરૂ થશે અને છેલ્લા તબક્કાનું મતદાન 1 જૂને થશે, જ્યારે 4 જૂને પરિણામ જાહેર થશે.
