નવી દિલ્હીઃ ઈઝરાયલે ગાઝા પટ્ટીમાં હમાસ વિરુદ્ધ તેની કાર્યવાહી તેજ કરી છે. આ દરમિયાન તેણે હમાસના આતંકવાદી ઠેકાણાઓ પર જોરદાર હુમલો કર્યો હતો. ઈઝરાયેલ તરફથી કહેવામાં આવ્યું છે કે, 24 કલાકમાં ઈઝરાયેલની સેનાએ હમાસના 450થી વધુ ઠેકાણાઓને નષ્ટ કરી દીધા છે. તેમાં આતંકવાદી છાવણીઓ, સૈન્ય મથકો, અવલોકન ચોકીઓ, મિસાઈલ પ્રક્ષેપણ સ્થળો અને અન્ય મહત્વના સ્થળોનો સમાવેશ થાય છે. આ સિવાય એક આતંકી કમાન્ડર જમાલ મુસા પણ માર્યો ગયો છે. ઇઝરાયેલની સેનાએ હમાસના ઘણા સૈન્ય મથકો પર પણ કબજો કરી લીધો છે. આ અડ્ડાઓમાં આતંકવાદીઓને તાલીમ આપવા માટે વપરાતા કેન્દ્રોનો પણ સમાવેશ થાય છે. ઈઝરાયેલની સેનાએ ગાઝામાં સ્થિત આતંકવાદીઓની ભૂગર્ભ સુરંગોને પણ નષ્ટ કરી દીધી છે.
ઇઝરાયેલી સેનાએ જણાવ્યું હતું કે, તેણે ISA અને IDF ગુપ્તચર એજન્સીઓની મદદથી હમાસના આતંકવાદી કમાન્ડર જમાલ મૂસાને પણ મારી નાખ્યો છે. મુસા હમાસની વિશેષ સુરક્ષા કામગીરી માટે જવાબદાર હતો. આ કાર્યવાહીથી ગાઝા પટ્ટીમાં તણાવ વધુ વધી ગયો છે. હમાસે ઈઝરાયેલના હુમલાનો જવાબ આપવાની ધમકી આપી છે. દરમિયાન, ગાઝામાં આરોગ્ય મંત્રાલયે જણાવ્યું હતું કે રાત્રે ઇઝરાયેલના હવાઈ હુમલામાં આઠ પેલેસ્ટિનિયન માર્યા ગયા હતા. આરોગ્ય મંત્રાલયે એક નિવેદનમાં જણાવ્યું હતું કે મૃતકોમાંથી ચાર આંખની હોસ્પિટલમાં હતા જ્યારે બાકીના ચાર બાળકોની રેન્ટિસી હોસ્પિટલમાં હતા. નિવેદનમાં કહેવામાં આવ્યું છે કે, ઇઝરાયેલના હવાઈ હુમલામાં ગાઝા સિટીની એકમાત્ર માનસિક હોસ્પિટલનો પણ નાશ થયો હતો.
