જામનગરઃ શહેરની ભાગોળે ખીજડીયા બાયપાસ પાસે મોડી રાત્રે ગમખ્વાર અકસ્માતમાં બે યુવાનોના ઘટના સ્થળે જ કમકમાટી ભર્યા મૃત્યુ નીપજ્યા હતા. બનાવ એટલો ભયાનક હતો કે બંને મૃતકો બંને ટ્રક વચ્ચે ફસાઈ ગયા હતા.બનાવની જાણ થતાં પોલીસ અને ફાયરની ટીમે સ્થળ પર પહોંચી બંને મૃતદેહને બહાર કાઢી, રોડ પર ફસાઈ ગયેલા વાહનોને અલગ કર્યા હતા.
સૂત્રોના જણાવ્યા મુજબ ગત મોડી રાત્રે ખીજડીયા બાયપાસ પાસે બે ટ્રક વચ્ચે ગમખ્વાર અકસ્માત સર્જાયો હતો. ધડાકાભેર બંને ટ્રક સામસામે અથડાતા બાયપાસ મરણચીસોથી ગુંજી ઉઠ્યો હતો. આ અકસ્માત એટલો ભયાનક હતો કે, બંને ટ્રકના મોઢા સામસામે ટકરાતા એકબીજા સાથે જોઈન્ટ થઇ ગયા હતા. આ બનાવમાં બે યુવાનોને માથા સહિતના ભાગે ગંભીર ઈજાઓ પહોંચતા બંનેના ઘટના સ્થળે જ કમકમાટીભર્યા મોત નીપજ્યા હતા.
બનાવની જાણ થતા પંચકોશી એ ડીવીઝન પોલીસ અને ફાયરની ટીમ ઘટના સ્થળે પહોચી હતી. ફાયરની ટીમે તાત્કાલિક બચાવ કામગીરી હાથ ધરી બંન્ને વાહનોને અલગ કરી બંને મૃતકોને બહાર કાઢ્યા હતા. પોલીસે ટ્રાફિક પૂર્વવત કર્યો હતો. મૃતકોની ઓળખ અને બનાવના કારણ સહિતની વિગતો મેળવવા પોલીસે વધુ તપાસ હાથ ધરી છે.
(Photo-File)