કર્ણાટક ચૂંટણી: સીએમ બસવરાજ બોમ્માઈએ શિગગાંવ બેઠક પરથી ઉમેદવારી નોંધાવી,હુબલીમાં કરી વિશેષ પૂજા
બેંગલુરુ : કર્ણાટકના મુખ્ય પ્રધાન બસવરાજ બોમ્માઈએ શનિવારે તેમના ગૃહ મતવિસ્તાર શિગગાંવથી આગામી વિધાનસભા ચૂંટણી માટે ઉમેદવારી નોંધાવી હતી. ઉમેદવારી નોંધાવ્યા બાદ મુખ્યમંત્રીએ જીતનો દાવો કર્યો છે. આ દરમિયાન તેમની સાથે ભાજપના અનેક મોટા નેતાઓ અને કાર્યકર્તાઓ હાજર રહ્યા હતા.
તેમના ઘરેલુ મતવિસ્તારમાં ઉમેદવારી પત્ર ભરતા પહેલા, બોમ્માઈએ સિદ્ધરુઢ મઠની મુલાકાત લીધી અને ભગવાનના આશીર્વાદ લીધા. એક ટ્વીટમાં મુખ્યમંત્રીએ કહ્યું, “નવા ભારત માટે નવા કર્ણાટકના નિર્માણ માટે આજે મારા ગૃહ મતવિસ્તાર શિગગાંવ-સાવનુરમાં ઉમેદવારી પત્રો ભરતા પહેલા, મેં મારા દેવતા સિદ્ધરુઢ મઠની મુલાકાત લીધી અને ભગવાનના આશીર્વાદ લીધા.” બોમ્માઈએ કહ્યું, “ભારતીય જનતા પાર્ટી (BJP) વહેલી તકે ચૂંટણી માટે ઉમેદવારોની તેની ત્રીજી યાદી જાહેર કરશે.”
નોંધનીય છે કે 10 મેના રોજ યોજાનારી વિધાનસભા ચૂંટણી માટે પાર્ટીએ અત્યાર સુધીમાં 224 વિધાનસભા બેઠકોમાંથી 212 સીટોના નામની જાહેરાત કરી છે. હુબલી-ધારવાડ સેન્ટ્રલ અને શિવમોગ્ગા શહેર સહિત બાકીની 12 બેઠકો માટે ઉમેદવારોના નામ જાહેર કરવાના બાકી છે, જેનું પ્રતિનિધિત્વ અનુક્રમે જગદીશ શેટ્ટર અને કેએસ ઇશ્વરપ્પા કરે છે.
