મુંબઈ:મહારાષ્ટ્રના રાજકારણમાં 10 દિવસના બળવા બાદ મોટો ફેરફાર કરનાર શિવસેનાના ધારાસભ્ય એકનાથ શિંદેની નવી સરકાર આજે ફ્લોર ટેસ્ટનો સામનો કરશે.મુખ્યમંત્રી એકનાથ શિંદેએ વિધાનસભામાં ફ્લોર ટેસ્ટ પહેલા રવિવારે મોડી રાત્રે મુંબઈની એક હોટલમાં તેમના ધારાસભ્યો સાથે બેઠક કરી હતી.જેમાં ભાજપના ક્વોટામાંથી ડેપ્યુટી સીએમ દેવેન્દ્ર ફડણવીસ સહિત તમામ ધારાસભ્યોએ પણ ભાગ લીધો હતો.
ફ્લોર ટેસ્ટ પહેલા, ભાજપ-શિંદે જૂથના ધારાસભ્યોએ એકનાથ શિંદેને તેમના નેતા તરીકે ચૂંટ્યા છે. સ્પીકર રાહુલ નાર્વેકરે પણ શિંદેને નેતા તરીકે માન્યતા આપી છે.તેમના વતી ભરત ગોગાવલેને ચીફ વ્હીપ તરીકે નિયુક્ત કરવામાં આવ્યા છે.જ્યારે ઉદ્ધવ જૂથના અજય ચૌધરીને પ્રથમ ધારાસભ્ય દળના નેતા બનાવવામાં આવ્યા હતા, તેમની નિમણૂક સ્પીકરે રદ કરી છે. તેમની સાથે સુનિલ પ્રભુને પણ ચીફ વ્હીપના પદ પરથી હટાવી દેવામાં આવ્યા છે.આ પછી ઉદ્ધવ જૂથના ધારાસભ્યો સામે મોટી સમસ્યા ઊભી થઈ છે. જો તેઓ નવા ચીફ વ્હીપના આદેશનું પાલન નહીં કરે તો તેમની સામે ગેરલાયકાતની કાર્યવાહીનો માર્ગ ખુલશે.
શિવસેના-ભાજપ ગઠબંધન સરકાર વિધાનસભાના વિશેષ સત્રના બીજા દિવસે સોમવારે ફ્લોર ટેસ્ટનો સામનો કરવા માટે તૈયાર છે, એમ એક ધારાસભ્યએ મુંબઈની હોટલમાં યોજાયેલી બેઠક વિશે જણાવ્યું હતું. તમામ ધારાસભ્યોની હાજરીમાં મળેલી બેઠકમાં ફ્લોર ટેસ્ટ માટે સરકારની રણનીતિ શું હશે તેની ચર્ચા કરવામાં આવી હતી.જોકે, ફ્લોર ટેસ્ટ પહેલા ભાજપ-શિંદે જૂથના ઉમેદવાર રાહુલ નાર્વેકર સ્પીકર તરીકે ચૂંટાયા બાદ સરકારને જાદુઈ આંકડા મેળવવામાં કોઈ મુશ્કેલીનો સામનો કરવો નહીં પડે તેવું લાગી રહ્યું છે.
હકીકતમાં, 288 સભ્યોની વિધાનસભામાં રવિવારે યોજાયેલી સ્પીકર ચૂંટણીમાં ભાજપ-શિંદે જૂથની તરફેણમાં 164 મત પડ્યા હતા. જોકે, સ્પીકરની ચૂંટણી જીતવા માટે 144 વોટની જરૂર હતી. એટલે કે રાહુલ નાર્વેકરને જીત કરતાં 20 વોટ વધુ મળ્યા, જ્યારે વિપક્ષના ઉમેદવાર રાજન સાલ્વીને 107 ધારાસભ્યોએ વોટ આપ્યા. રાહુલ નાર્વેકરે તેમના પ્રતિસ્પર્ધીને 47 મતોના જંગી અંતરથી હરાવ્યા હતા.