ડાયાબિટિશ, બ્લડ પ્રેશર અને લિવર ઇન્ફેક્શન સહિતની અનેક બીમારીઓમાં રાહત આપનારી દવાઓ થઇ સસ્તી
સરકાર દ્વારા કેટલીક દવાઓની કિંમત ઘટાડવામાં આવી છે. ડાયાબિટીસ, હૃદય, લીવર, ઈન્ફેક્શન અને એલર્જીની દવાઓ સસ્તી થઈ ગઈ છે. કેન્દ્ર સરકારે તેમની નવી કિંમતો નક્કી કરી છે. નેશનલ ફાર્માસ્યુટિકલ પ્રાઇસિંગ ઓથોરિટી (NPPA) એ તેની 123મી બેઠકમાં 41 દવાઓ અને સાત ફોર્મ્યુલેશનની કિંમતો ઘટાડવાનો નિર્ણય લીધો હતો. આ અંતર્ગત વિવિધ કંપનીઓની દવાઓની છૂટક કિંમતો નક્કી કરવામાં આવી હતી. તેમાં મલ્ટીવિટામિન્સ અને એન્ટિબાયોટિક્સનો પણ સમાવેશ થાય છે. દેશમાં 10 કરોડથી વધુ લોકો ડાયાબિટીસ અને 8 કરોડથી વધુ લોકો બીપીથી પીડિત છે. આ ઉપરાંત ગેસ, વિટામીન ડી કે અન્ય વિટામીનની ઉણપને કારણે તેમની દવાઓનો ધંધો પણ દર વર્ષે ઝડપથી વધી રહ્યો છે. અનુમાન મુજબ, NPPAના આ નિર્ણયથી 30 કરોડથી વધુ લોકોને સીધી રાહત મળશે.
NPPAએ ગુરુવારે નોટિફિકેશન જાહેર કરીને આ જાણકારી આપી છે. સામાન્ય રીતે ઈન્ફેક્શન, એલર્જી સિવાય મલ્ટીવિટામીન અને એન્ટીબાયોટીક્સના ભાવ વધારે હોય છે. જેના કારણે સામાન્ય સારવારનો ખર્ચ પણ વધી જાય છે. તેથી દવાઓ સસ્તી થશે તો લોકોને રાહત મળશે. ફેબ્રુઆરીમાં NPPAએ સુગર અને BP સહિત 69 દવાઓના ભાવમાં સુધારો કર્યો હતો અને નવી કિંમતો લાગુ કરી હતી, જેમાં 31 ફોર્મ્યુલેશન દવાઓનો પણ સમાવેશ થાય છે. આ ઓર્ડરમાં મેટફોર્મિન, સિતાગ્લિપ્ટિન, બિસોપ્રોલોલ ઉપરાંત વિટામિન ડી3, પેન્ટોપ્રાઝોલ, ટેલમિસારટન, આઇસોનિયાઝિડ જેવી દવાઓ અને ફોર્મ્યુલેશનનો સમાવેશ થાય છે.
NPPAના એક વરિષ્ઠ અધિકારીએ જણાવ્યું કે દવાઓની મર્યાદા કિંમત અને છૂટક કિંમતમાં આ સુધારો જથ્થાબંધ ભાવ સૂચકાંકના આધારે નક્કી કરવામાં આવ્યો છે. આ અંતર્ગત તાજેતરમાં કોરોનરી સ્ટેન્ટની કિંમતમાં ફેરફાર કરવામાં આવ્યો હતો. વર્ષ 2013માં જથ્થાબંધ ભાવ સૂચકાંકમાં 0.00551 ટકાનો વધારો થયો છે. તેમણે એ પણ માહિતી આપી હતી કે દવાઓ અને તબીબી ઉપકરણોના ભાવ સુધારણાની દેખરેખ માટે જવાબદાર સમિતિનું વિસ્તરણ કરવાનો પણ નિર્ણય લેવામાં આવ્યો છે. સરકાર પહેલીવાર આ કમિટીમાં ઉદ્યોગ ક્ષેત્રના પ્રતિનિધિઓને પણ સામેલ કરશે.
