અમદાવાદ: એક સમય હતો, પાસપાર્ટ મેળવવો મુશ્કેલ હતો. એજન્ટોની મદદ લેવી પડતી હતી, કલાકો સુધી લાઈનો ઊભા રહેવું પડતું હતું. ત્યારબાદ પાસપોર્ટ સેવા કેન્દ્રો શરૂ કરાતા લોકોને થોડી રાહત થઈ હતી. જેમાં ઓનલાઈન એપ્લીકેશન કર્યા બાદ નિયત તારીખે તમામ દસ્તાવેજો સાથે પાસપોર્ટ સેવા કેન્દ્રો પર જવું પડે છે. હવે એમાં વધુ એક સુવિધાનો ઉમેરો કરવામાં આવી રહ્યો છે. પાસપોર્ટ સેવા માટે હરતી-ફરતી વાન શરૂ કરાશે. તેથી નાગરિકોને પોતાના ઘરની નજીક પાસપોર્ટની સેવા મળી રહેશે.
દેશમાં ડિજિટલ ઈન્ડિયા યોજનાને લીધે સરકારે દરેક સેવાને ડિજિટલ કરી દીધી છે. પરંતુ હવે ઘરે બેસીને પાસપોર્ટ મેળવી શકાશે. અમદાવાદમાં પાસપોર્ટ સેવા વધુ સરળ બનાવાશે. શહેરમાં હરતી ફરતી પાસપોર્ટ સેવા વાન શરૂ કરાશે. વેનમાં પાસપોર્ટ સેવા કેન્દ્રોની જેમ દસ્તાવેજ સ્કેન કરી ફિંગર પ્રિન્ટ અને ફોટો લેવાશે. શહેરમાં નક્કી કરેલા સ્થળોએ નિયત દિવસે પાસપાર્ટવાન સેવા આપશે. તેના માટેની પોલીસી બનાવવામાં આવી રહી છે. સિનિયર સિટીઝન માટે આ વેન સૌથી વધુ ઉપયોગી પુરવાર થશે. પાસપોર્ટ વેનમાં પાસપોર્ટ કચેરીનો એક અનુભવી કર્મચારી તેમજ એક ટીસીએસ હાજર રહેશે. ફાઈલ પાસપોર્ટ ઓફિસના ગ્રાન્ટિંગ ઓફિસર મંજૂર કરશે.
સૂત્રોના જણાવ્યા મુજબ અમદાવાદમાં હરતી ફરતી પાસપોર્ટ સેવા માટેની સર્વિસ વેન શરૂ થતાં પાસપોર્ટ ઓફિસમાં પડતો લોડ ઓછો થશે. શહેરમાં હરતી ફરતી વેન શરૂ થવાથી લોકોએ પાસપોર્ટ સેવા કેન્દ્ર સુધી લાંબા થવું પડશે નહીં અને સમયની પણ બચત થશે. વિદેશ મંત્રાલયે તૈયાર કરેલા પાઈલટ પ્રોજેક્ટ હેઠળ દેશમાં ચંદીગઢ અને પૂણે બાદ અમદાવાદમાં આ હરતી-ફરતી પાસપોર્ટ વેન સેવા શરૂ કરાશે. આઈટી કંપની ટીસીએસે બનાવેલી આ પાસપોર્ટ વેનને કેવી રીતે ચલાવવી તે અંગે ટૂંક સમયમાં એસઓપી ઘડાયા પછી અમદાવાદ રિજનલ પાસપોર્ટ તેને ખુલ્લી મુકશે. એક મહિનો વેન રિજનલ પાસપોર્ટ કચેરી ખાતે ઊભી રાખવામાં આવશે. ત્યારબાદ શહેરમાં નક્કી કરેલા સ્થળોએ નિયત દિવસે વાન ઊભી રખાશે. અમદાવાદ ઉપરાંત આસપાસના જે ગ્રામ્ય વિસ્તારોમાં જ્યાં પાસપોર્ટની વધુ અરજીઓ આવતી હોય ત્યાં વેન ફરતી રહેશે. ઓનલાઈન એપ્લિકેશનનું ભારણ વધી જાય ત્યારે આ વેન ઉપયોગી સાબિત થશે. પાસપોર્ટની ઓનલાઇન એપોઇમેન્ટ બુક કરશો ત્યારે વેનનો પણ વિકલ્પ અપાશે. વાન કયા વિસ્તારમાં કેટલા વાગ્યા સુધી ઉપલબ્ધ રહેશે તે વિસ્તારમાં એપોઈમેન્ટ બુક કરતાં અરજદારોએ વેનનો વિકલ્પ પસંદ કરવાનો રહેશે.
