નવી દિલ્હીઃ મોદી સરકાર તેના ત્રીજા કાર્યકાળમાં ભ્રષ્ટ અને આળસુ અધિકારીઓ તથા કર્મચારીઓની ઓળખ કરીને તેમને નિવૃત્ત કરવાની તૈયારી કરી રહી છે. વડાપ્રધાન નરેન્દ્ર મોદીએ મંત્રાલયોના કામકાજમાં પારદર્શિતા સુનિશ્ચિત કરવા માટે મંત્રીઓ અને સચિવોને મિશન મોડમાં કામ કરવાનો નિર્દેશ આપ્યો છે. આ સૂચના મંત્રી પરિષદની બેઠકમાં આપવામાં આવી હતી, જ્યાં પીએમ મોદીએ ભ્રષ્ટાચાર વિરુદ્ધ અભિયાનને વધુ તીવ્ર બનાવવા પર ભાર મૂક્યો હતો. વડાપ્રધાન નરેન્દ્ર મોદીએ કેન્દ્રીય સિવિલ સેવા(સીસીએમ) નિયમોને ટાંકીને કેન્દ્રીય સચિવોને કર્મચારીઓનું મૂલ્યાંકન કરવા અને તેમની વિરુદ્ધ ફરિયાદ કરનારાઓ સામે તાત્કાલિક પગલાં લેવાનો નિર્દેશ આપ્યો છે. તેમણે એ વાત પર પણ ભાર મૂક્યો છે કે ઈમાનદાર અને કામ કરતી સરકારને લોકો ચૂંટણીમાં પુરસ્કાર આપે છે. હરિયાણા અને જમ્મુ અને કાશ્મીરમાં ભાજપની ચૂંટણીમાં મળેલી સફળતાને ટાંકીને, તેમણે જાહેર ફરિયાદોના ઝડપી નિરાકરણ અને બહેતર શાસન પર ભાર મૂક્યો હતો.
સૂત્રોના જણાવ્યા અનુસાર, મોદીએ અધિકારીઓ અને મંત્રીઓને એ સુનિશ્ચિત કરવા માટે નિર્દેશ આપ્યો છે કે ફાઇલો એક ડેસ્કથી બીજા ડેસ્ક પર મોકલવામાં ન આવે, પરંતુ તેનો ઝડપથી ઉકેલ આવે. વડા પ્રધાને અધિકારીઓને ફરિયાદોના નિરાકરણ અને રાજ્યના પ્રધાનોની પ્રગતિ પર નજર રાખવા માટે અઠવાડિયામાં એક દિવસ ફાળવવા પણ કહ્યું છે. તેમણે એમ પણ કહ્યું કે મંત્રાલયોમાં કામ કરતા અધિકારીઓ અને કર્મચારીઓએ લોકોનું જીવન સરળ બનાવવા માટે કામ કરવું જોઈએ. ફરિયાદો પર તાત્કાલિક પગલાં લેવા જોઈએ. જે અધિકારીઓ અને કર્મચારીઓની ઓળખ ભ્રષ્ટ અથવા આળસુ તરીકે થાય છે તેમને સેવામાંથી કાઢી નાખવા જોઈએ. સૂત્રોએ જણાવ્યું કે મોદીએ કહ્યું કે છેલ્લા 10 વર્ષમાં પીએમઓને લોકોની ફરિયાદો સહિત 4.5 કરોડ પત્રો મળ્યા હતા, જ્યારે મનમોહન સિંહના કાર્યકાળના છેલ્લા પાંચ વર્ષમાં આવા માત્ર 5 લાખ પત્રો મળ્યા હતા.
તેમણે ભારપૂર્વક જણાવ્યું હતું કે, લોકો ફરિયાદોના નિવારણ માટે વધુ આશાવાદી છે. પીએમ મોદીએ કહ્યું કે આમાંથી લગભગ 40 ટકા કેસ કેન્દ્ર સરકારના વિભાગો અને એજન્સીઓ સાથે સંબંધિત છે, જ્યારે બાકીના 60 ટકા કેસ રાજ્ય સરકાર સાથે સંબંધિત છે.
