- ખેડૂતોની ઘરવાપસી પરંતુ ગાઝીપુર અને સિંધુ બોર્ડર ટ્રાફિક માટે નહીં ચાલુ થાય
- તેના પાછળ કેટલાક કારણો છે
- NHAIએ આપ્યા કારણો
નવી દિલ્હી: છેલ્લા એક વર્ષથી ચાલતા ખેડૂત આંદોલનની સરકાર સાથે સમજૂતી બાદ સમાપ્તિ થઇ છે અને ખેડૂતોએ દિલ્હી બોર્ડર ખાલી કરીને ઘરવાપસી કરી છે. ગાઝીપુર બોર્ડર અને સિંધુ બોર્ડર પણ ખેડૂતોએ ખાલી કરી દીધી છે. જો કે હજુ પણ ગાઝીપુર અને સિંધુ બોર્ડર પર ટ્રાફિક શરૂ થયો નથી. NHAIએ કહ્યું કે, તેને ફરી શરૂ કરવામાં હજુ વિલંબ થશે. જાન્યુઆરી માસથી જ તેને ટ્રાફિક માટે ખોલવામાં આવે તેવી સંભાવના છે.
આ બોર્ડર પર ટ્રાફિક શરૂ કરવામાં વિલંબનું કારણ આપતા NHAIએ કહ્યું હતું કે, પોલીસે ખેડૂતોના વિરોધ અને હલ્લાબોલને રોકવા માટે ખેડૂતોના આંદોલન દરમિયાન ત્યાં કોંક્રિટના બેરિકેડ બનાવ્યા હતા. તેને દૂર કરવામાં પણ સમય લાગી રહ્યો છે. ઉપરાંત, તેને દૂર કર્યા પછી, સમગ્ર વિસ્તારનું ફરીથી નિરીક્ષણ હાથ ધરાશે. ત્યારબાદ તેમને સામાન્યલોકો માટે ખોલી શકાય છે.
NHAI અધિકારીઓએ જણાવ્યું હતું કે NH-24, NH-9 અને NH-44 પર બંને બાજુના નિરીક્ષણનું કામ 15 ડિસેમ્બરથી શરૂ થશે.ખેડૂતોએ આજે આ સરહદો સંપૂર્ણપણે ખાલી કરી દીધી છે અને NHAI ટીમોએ અહીં કામ કરવાનું શરૂ કરી દીધું છે. અધિકારીઓના જણાવ્યા અનુસાર, આ પછી બંને બાજુના ભાગોને સંપૂર્ણપણે સાફ કરવામાં 2 અઠવાડિયાનો સમય લાગશે.
અમારી ટીમ NH ના નાશ પામેલા ભાગોનું નિરીક્ષણ કરશે. આ પછી સમારકામની કામગીરી શરૂ થશે. નવા વર્ષથી લોકો તેના પર મુસાફરી કરી શકશે.
બીજી તરફ, BKU પ્રવક્તા ચૌધરી રાકેશ ટિકૈત 383 દિવસ પછી ઘરે પરત ફરશે અને બુધવારે તેઓ સિસૌલી પહોંચશે. તેમના સ્વાગત માટે સિસૌલીને રંગબેરંગી રોશનીથી શણગારવામાં આવી છે.