નવી દિલ્હીઃ જમ્મુના અખનૂર વિસ્તારમાં પાકિસ્તાન તરફથી ગોળીબાર થઈ રહ્યો છે. જેમાં બીએસએફનો એક જવાન ઘાયલ થયો હતો. આ હુમલા બાદ સેના હાઈ એલર્ટ પર છે. જમ્મુના પીઆરઓ બીએસએફના જણાવ્યા અનુસાર, ગોળીબારની ઘટના ગઈકાલે રાત્રે લગભગ 2.35 વાગ્યે થઈ હતી.
આ પહેલા, સેનાએ સોમવારે રાજોરી જિલ્લાના નૌશેરા સેક્ટરમાં એલઓસી પર ઘૂસણખોરીના કાવતરાને નાકામ કરી બે પાકિસ્તાની આતંકવાદીઓને ઠાર કર્યા હતા. ઘટના બાદ સમગ્ર એલઓસી પર સતર્કતા વધારી દેવામાં આવી છે. આતંકવાદીઓ પાસેથી બે એકે 47 રાઈફલ, નાઈટ વિઝન સાથે એમ-4 કાર્બાઈન, પિસ્તોલ, આઠ ગ્રેનેડ અને અન્ય યુદ્ધ જેવી સામગ્રી મળી આવી છે.
ઓપરેશન કાંચી ગુપ્તચર એજન્સીઓ અને જમ્મુ-કાશ્મીર પાસેથી મળેલી ગુપ્ત માહિતીના આધારે હાથ ધરવામાં આવ્યું હતું. આ દરમિયાન 8 અને 9 સપ્ટેમ્બરની રાત્રે નૌશેરા સેક્ટરના લામ વિસ્તારમાં એક અભિયાન ચલાવવામાં આવ્યું હતું. આ દરમિયાન આતંકીઓનું એક જૂથ ઘૂસણખોરીનો પ્રયાસ કરી રહ્યું હોવાનું જાણવા મળ્યું હતું. જ્યારે આતંકવાદીઓ નજીક આવ્યા અને તેમને પડકાર્યા તો તેઓએ ફાયરિંગ શરૂ કરી દીધું. જવાબી કાર્યવાહીમાં અમે એક પછી એક બે આતંકવાદીઓને ઠાર કરવામાં સફળ રહ્યા હતા.
જેમ-જેમ જમ્મુ-કાશ્મીરમાં ચૂંટણી નજીક આવી રહી છે તેમ-તેમ પાકિસ્તાન તરફથી ઘૂસણખોરીના ષડયંત્રો તેજ થયા છે. પ્રથમ તબક્કામાં ડોડા, કિશ્તવાડ અને રામબનની 8 બેઠકો અને દક્ષિણ કાશ્મીરમાં અનંતનાગ, પુલવામા, કુલગામ અને શોપિયાંની 16 બેઠકો પર 18 સપ્ટેમ્બરે મતદાન છે. જમ્મુ ડિવિઝનના રાજોરી, પૂંચ, ડોડા, કઠુઆ, રિયાસી અને ઉધમપુરમાં છેલ્લા બે મહિનામાં ઘણા હુમલા થયા છે. આ વિસ્તારમાં 40 થી 50 આતંકવાદીઓની હાજરીની માહિતી મળતાં સેનાએ આ વિસ્તારમાં 4000 પ્રશિક્ષિત સૈનિકોને તૈનાત કર્યા છે, જેઓ ગાઢ જંગલોમાં દુશ્મનોને ખતમ કરવામાં માહિર છે.
રાજોરી જિલ્લામાં બીજા તબક્કામાં યોજાનારી ચૂંટણી પહેલા સુરક્ષા વધારી દેવામાં આવી છે. સતત પેટ્રોલિંગની સાથે પોલીસ, સેના અને સીઆરપીએફ દ્વારા વિશેષ ચોકીઓ ગોઠવીને ચેકિંગ કરવામાં આવી રહ્યું છે. રોડ માર્ચ કાઢીને લોકોને આશ્વાસન આપવાનો પ્રયાસ કરવામાં આવી રહ્યો છે કે તેઓ કોઈ પણ ડર વિના મતદાન કરવા આગળ આવે.