ગાંધીનગરઃ શહેર અને જિલ્લામાં રોડ અકસ્માતોના બનાવો વધતા જાય છે. જેમાં વધુ એક અકસ્માતનો બનાવ બન્યો હતો. ગાંધીનગર-અમદાવાદ હાઈવે પર ખોરજ બ્રિજ નજીક કારના ચાલકે પૂરપાટ ઝડપે ટક્કર મારતાં રાહદારી વૃદ્ધ દંપતી ઉછળીને રોડ ઉપર પટકાયા હતા. આ અકસ્માતમાં કારનો આગળનો કાચ પણ તૂટી ગયો હતો. જ્યારે ગંભીર ઈજાગ્રસ્ત વૃદ્ધનું ઘટનાસ્થળે મોત નીપજ્યું હતું. આ અંગે અડાલજ પોલીસે ગુનો નોંધી કાયદેસરની કાર્યવાહી હાથ ધરી છે.
પોલીસ સૂત્રોના જણાવ્યા મુજબ ગાંધીનગરના શેરથા ગામમાં રહેતા ભીખાભાઈ શનાભાઈ વાઘેલાના પાંચ કાકા પૈકી બીજા નંબરના કાકા જયંતીભાઈ શકરાભાઇ વાઘેલા (ઉ.58) શેરથા ગામ વાલ્મીકીવાસ ખાતે તેમની પત્ની પાલીબેન તથા દિકરી આરતીબેન સાથે રહેતા હતા. જયંતીભાઈ વાઘેલા ગ્રામ પંચાયત મારફતે ગામની અંદર સફાઈ કામ કરતા હતા. દરમિયાન ખોરજગામ ખાતે સંબંધીના ત્યા લગ્ન પ્રસંગ હોવાથી તમામ કુંટુંબ ત્યા ભેગુ થયેલ હતુ. જેમાં જયંતીભાઈ તથા તેમની પત્ની પાલીબેન બન્ને પણ ગયા હતા. લગ્ન પ્રસંગ પ્રસંગ પુરો કરી બંને જણા બપોરના આશરે સવા બે વાગ્યાની આસપાસ પોતાના ઘેર જવા માટે નિકળ્યા હતા. દરમિયાન આશરે અઢી વાગે કૌટુબિક ભાઇ વિપુલભાઇ બળદેવભાઈ વાઘેલાએ ભીખાભાઈને કાકા કાકીને ખોરજ બ્રીજ પાસે અકસ્માત થયાની જાણ કરી હતી. જેનાં પગલે કુટુંબનાં લોકો અકસ્માત સ્થળે દોડી ગયા હતા. અને જોયું તો ખોરજ બ્રીજ ચઢતા પેટ્રોલપંપની સામે અમદાવાદથી ગાંધીનગર તરફ જતા રોડ ઉપર જયંતિભાઈ લોહી લુહાણ મૃત્યુ પામેલી હાલતમાં પડ્યા હતા. તેમજ વેગેનાર ગાડી પણ સ્થળ ઉપર પડી હતી. જેનો આગળનો મેઇન કાચ અને હેડ લાઈટ તૂટી તૂટેલી હતી. જ્યારે ઈજાગ્રસ્ત પાલીબેનને 108 એમ્બ્યુલન્સ મારફતે ગાંધીનગર સિવિલ લઈ જવાયા હોવાનું માલુમ પડયું હતું. આ અંગે અડાલજ પોલીસે કાર ચાલક વિરુદ્ધ ગુનો નોંધી કાયદેસરની કાર્યવાહી હાથ ધરી છે.
