પાકિસ્તાનનું વિલય થશે અથવા ખતમ થઈ જશેઃ CM યોગીનો દાવો
- પાર્ટિશન ડિઝાસ્ટર મેમોરિયલ ડે પર આયોજીત કાર્યક્રમમાં રહ્યાં હાજર
- ભારતના ભાગલા માટે સીએમ યોગીએ કોંગ્રેસ પર કર્યાં આકરા પ્રહાર
લખનૌઃ ઉત્તર પ્રદેશની રાજધાની લખનૌમાં ‘પાર્ટિશન ડિઝાસ્ટર મેમોરિયલ ડે’ પર આયોજિત કાર્યક્રમમાં ઉત્તર પ્રદેશના મુખ્યમંત્રી યોગી આદિત્યનાથે પાકિસ્તાનને લઈને મોટો દાવો કર્યો છે. તેમણે ઈશારામાં કહ્યું છે કે, પાકિસ્તાન ભારતમાં ભળી જશે. વિભાજનના ભયાનક દિવસે મુખ્યમંત્રી યોગી આદિત્યનાથે પાડોશી દેશ પાકિસ્તાનને લઈને મોટો દાવો કર્યો હતો અને કહ્યું હતું કે કાં તો પાકિસ્તાન વિલીન થઈ જશે અથવા તો બરબાદ થઈ જશે.
મુખ્યમંત્રીએ કહ્યું કે, વિભાજનની દુર્ઘટના માટે કોંગ્રેસ ક્યારેય માફી માંગશે નહીં. કોંગ્રેસને જ્યારે પણ મોકો મળ્યો તેણે દેશનું ગળું દબાવી દીધું. તેમના પાપ ક્યારેય માફ કરી શકાતા નથી. બાંગ્લાદેશમાં 1947માં 22% હિંદુઓ હતા, આજે માત્ર 7% બાકી છે. આપણી બધી સહાનુભૂતિ એ હિન્દુઓ સાથે હોવી જોઈએ. અખંડ ભારતનું સપનું જ આવી ઘટનાઓનો ઉકેલ હશે.
CMએ કહ્યું કે, જો 1947માં ભારતના રાજકીય નેતૃત્વમાં મજબૂત ઈચ્છાશક્તિ હોત તો દુનિયાની કોઈ પણ શક્તિ આ અકુદરતી ભાગલા ન કરી શકી હોત. પરંતુ કોંગ્રેસની સત્તાના લોભે ભારતને બરબાદ કરી નાખ્યું. તેઓ જ્યારે પણ સત્તામાં આવ્યા છે ત્યારે તેમણે દેશના ભોગે રાજનીતિ કરી છે.
સીએમએ કહ્યું કે, 1947માં જ્યારે પંડિત નેહરુ અને કોંગ્રેસ પાર્ટી ત્રિરંગો લહેરાવીને ઉજવણી કરી રહી હતી ત્યારે અસંખ્ય લોકોને તેમની માતૃભૂમિ છોડવાની ફરજ પડી હતી. મુખ્યમંત્રીએ કહ્યું કે છેલ્લા 10 વર્ષમાં ભારતની પ્રગતિ વિશ્વને આશ્ચર્યચકિત કરે છે. એટલા માટે જ્યારે દુનિયામાં ક્યાંય પણ સંકટ આવે છે ત્યારે દુનિયા ભારત તરફ જુએ છે.
#PartitionDisasterMemorialDay #YogiAdityanath #PakistanIntegration #CongressCriticism #IndiaPakistan #AkhandBharat #PoliticalLeadership #1947Partition #NationalUnity #HistoricalMemories
