PM મોદી 11 ડિસેમ્બરે મહારાષ્ટ્રની લેશે મુલાકાત,નાગપુર-મુંબઈ એક્સપ્રેસ વેનું કરશે ઉદ્ઘાટન
મુંબઈ:મહારાષ્ટ્રના નાયબ મુખ્યમંત્રી દેવેન્દ્ર ફડણવીસે શનિવારે જણાવ્યું હતું કે,વડાપ્રધાન નરેન્દ્ર મોદી અહીં 11 ડિસેમ્બરે મુંબઈ-નાગપુર સમૃદ્ધિ એક્સપ્રેસ વેનું ઉદ્ઘાટન કરશે.ફડણવીસે કહ્યું કે વડાપ્રધાન નાગપુરથી શિરડી સુધીના પૂર્ણ થયેલા ભાગનું ઉદ્ઘાટન કરશે, જ્યારે એક્સપ્રેસ વેનો બાકીનો ભાગ આગામી છ મહિનામાં તૈયાર થઈ જશે. ‘હિન્દુ હ્રદય સમ્રાટ બાળાસાહેબ ઠાકરે મહારાષ્ટ્ર સમૃદ્ધિ મહામાર્ગ’ એ છ લેનનો એક્સેસ-નિયંત્રિત હાઇવે છે.મુંબઈ-પુણે એક્સપ્રેસ-વે પછી તે રાજ્યનો બીજો એક્સપ્રેસ-વે છે.
નાયબ મુખ્યમંત્રીએ કહ્યું, “આ અમારા માટે આનંદ અને ગર્વની વાત છે કે,વડાપ્રધાન નરેન્દ્ર મોદી નાગપુર-મુંબઈ સમૃદ્ધિ એક્સપ્રેસ વેનું ઉદ્ઘાટન કરશે.તેઓ નાગપુરથી શિરડી સુધીના 500 કિલોમીટરના પટનું ઉદ્ઘાટન કરશે, જે પૂર્ણ થઈ ગયું છે અને બાકીનો વિભાગ છ મહિનામાં પૂર્ણ કરવામાં આવશે.14 જિલ્લાઓને એકીકૃત કરીને બંદર સાથે જોડવામાં આવશે.
ફડણવીસે કહ્યું,”મને લાગે છે કે,આ એક્સપ્રેસ વે વિદર્ભ, મરાઠવાડા અને સમગ્ર મહારાષ્ટ્રમાં ‘સમૃદ્ધિ’ લાવશે,” આ એક્સપ્રેસ વે 49,250 કરોડ રૂપિયાના ખર્ચે બાંધવામાં આવ્યો છે.તે 701 કિલોમીટર લાંબો છે અને 11 જિલ્લાના 392 ગામોમાંથી પસાર થાય છે.
