દિલ્હી : વડાપ્રધાન નરેન્દ્ર મોદી ત્રણ દેશોના પ્રવાસે રવાના થયા છે. ત્રણ દેશોના પ્રવાસના પ્રથમ તબક્કામાં વડાપ્રધાન મોદી જાપાનના હિરોશિમા પહોંચશે, જ્યાં તેઓ G-7 સમિટમાં ભાગ લેવાના છે. પીએમ મોદીના આગમન પહેલા જાપાનથી મોટા સમાચાર આવી રહ્યા છે. પીએમ મોદી તેમની મુલાકાત દરમિયાન યુદ્ધ પ્રભાવિત યુક્રેનના રાષ્ટ્રપતિ વોલોદિમિર ઝેલેન્સકીને પણ મળશે.
સમાચાર એજન્સીઓ અનુસાર, વડાપ્રધાન નરેન્દ્ર મોદીનો યુક્રેનના રાષ્ટ્રપતિ ઝેલેન્સકી સાથે મુલાકાતનો પણ કાર્યક્રમ છે. જો કે બંને નેતાઓની બેઠકના એજન્ડા અંગે હજુ સુધી કોઈ સત્તાવાર માહિતી બહાર આવી નથી. માનવામાં આવે છે કે બંને નેતાઓની મુલાકાત દરમિયાન યુદ્ધના કારણે સર્જાયેલી સ્થિતિ અને શાંતિ સ્થાપિત કરવાના પ્રયાસો પર ચર્ચા થઈ શકે છે.
ઉલ્લેખનીય છે કે ગયા વર્ષે એપ્રિલ મહિનામાં રશિયાએ સ્પેશિયલ મિલિટરી ઓપરેશનનું નામ આપીને યુક્રેન પર હુમલો કર્યો હતો. યુક્રેન પર રશિયન હુમલા બાદ પીએમ મોદી અને યુક્રેનના રાષ્ટ્રપતિ ઝેલેન્સકીની આ પહેલી મુલાકાત હશે. રશિયા સાથે યુદ્ધ શરૂ થયા બાદ યુક્રેનના રાષ્ટ્રપતિ ઝેલેન્સકીએ વડાપ્રધાન મોદીને ઘણી વખત ફોન કરીને યુદ્ધ રોકવા માટે દરમિયાનગીરી કરવાની અપીલ કરી હતી.
પીએમ મોદીએ યુદ્ધની શરૂઆતથી અત્યાર સુધી અનેકવાર બંને દેશોના વડાઓને શાંતિની અપીલ કરી છે. રશિયાના રાષ્ટ્રપતિ વ્લાદિમીર પુતિનની હાજરીમાં પણ શાંતિનો સંદેશ આપતા તેમણે સ્પષ્ટ કહ્યું છે કે યુદ્ધ કોઈ સમસ્યાનો ઉકેલ નથી. વાતચીત દ્વારા સમસ્યાનો ઉકેલ લાવવો જોઈએ.
જો કે, સંયુક્ત રાષ્ટ્ર અને અન્ય વૈશ્વિક મંચો પર પણ ભારતે રશિયા અને યુક્રેન વચ્ચે ચાલી રહેલા યુદ્ધને લઈને તેનું તટસ્થ વલણ જાળવી રાખ્યું છે. ભારતે શાંતિનો સંદેશ આપ્યો છે, બંને દેશોને યુદ્ધ બંધ કરવાની અપીલ કરી છે અને સંયુક્ત રાષ્ટ્રમાં રશિયા વિરુદ્ધ લાવવામાં આવેલા ઠરાવ પર મતદાનનો બહિષ્કાર પણ કર્યો છે. આવી સ્થિતિમાં વિશ્વની નજર વડાપ્રધાન નરેન્દ્ર મોદી અને યુક્રેનના રાષ્ટ્રપતિ ઝેલેન્સકી વચ્ચેની બેઠક પર ટકેલી છે.
વડાપ્રધાન નરેન્દ્ર મોદી જાપાન બાદ પોપુઆ ન્યુ ગીની અને ઓસ્ટ્રેલિયાની પણ મુલાકાત લેશે. PM મોદી શનિવારે જાપાનના હિરોશિમામાં આયોજિત ક્વાડ કોન્ફરન્સમાં ભાગ લેવાના છે. આ પછી, તેઓ પરમાણુ હુમલાના પીડિતોની યાદમાં બનાવવામાં આવેલા હિરોશિમા સ્મારક પર શ્રદ્ધાંજલિ આપશે. પીએમ મોદી દ્વારા મહાત્મા ગાંધીની પ્રતિમાનું અનાવરણ કરવાનો પણ કાર્યક્રમ છે.
