પ્રદૂષણના સ્તરમાં સુધાર પરંતુ દિલ્હીની હવા હજુ પણ ‘ખૂબ જ ખરાબ’

દિલ્હી:રાષ્ટ્રીય રાજધાની દિલ્હીમાં પ્રદૂષણના સ્તરમાં આજે સતત ત્રીજા દિવસે સુધારો થયો છે. દિલ્હી-એનસીઆરની હવાની ગુણવત્તા શ્વાસ લેવા યોગ્ય બની ગઈ છે.દક્ષિણ-પૂર્વના પવનોથી દેશની રાજધાનીમાં પ્રદૂષણમાંથી રાહત મળી છે.પવનની દિશા બદલાવાને કારણે દિલ્હી-NCRમાં પ્રદૂષણનું સ્તર ઘટ્યું છે.હવામાં સુધારો થતાં દિલ્હી-એનસીઆરમાં પ્રદૂષણના કારણે નિયંત્રણો પણ હળવા કરવામાં આવ્યા છે.ગ્રાપ-4ના કડક નિયંત્રણો હટાવી લેવામાં આવ્યા છે.

સેન્ટ્રલ પોલ્યુશન કંટ્રોલ બોર્ડ (CPCB) અનુસાર, સવારે 7 વાગ્યે અશોક વિહાર વિસ્તારમાં 367 AQI, અલીપોરમાં 358, બવાનામાં 381, IGI એરપોર્ટ પર 314 નોંધવામાં આવ્યો છે.શૂન્ય થી 50 વચ્ચેનો AQI ‘સારો’, 51 થી 100 વચ્ચે ‘સંતોષકારક’, 101 થી 200 ‘મધ્યમ’, 201 થી 300 ‘ખરાબ’, 301 થી 400 ‘ખૂબ ખરાબ’ અને 401 થી 50૦ વચ્ચેનો ‘ગંભીર’ માનવામાં આવે છે.તે જ સમયે, આગાહી અનુસાર, આવતીકાલે એટલે કે બુધવારે પણ હવાની ગુણવત્તામાં સુધારો થઈ શકે છે. જો કે, હવાની ગુણવત્તા AQI હજુ પણ અત્યંત ખરાબ શ્રેણીમાં રહેવાની અપેક્ષા છે.

હવામાનની આગાહી અનુસાર, હરિયાણા, પંજાબ અને રાજસ્થાનમાં હળવા વરસાદની શક્યતા છે. તે જ સમયે, કાશ્મીરમાં હિમવર્ષા સાથે જોરદાર પવન ફૂંકાઈ રહ્યો છે, જેની અસર ઉત્તર ભારતના રાજ્યોમાં જોવા મળી રહી છે.આવી સ્થિતિમાં, પ્રદૂષણનું સ્તર વધુ ઘટવાની સાથે, હવામાં સુધારો થવાની અપેક્ષા છે.હવામાનની વાત કરીએ તો, IMD અનુસાર, રાષ્ટ્રીય રાજધાનીમાં આજે 8 નવેમ્બરે લઘુત્તમ તાપમાન 17 ડિગ્રી સેલ્સિયસ છે જ્યારે મહત્તમ તાપમાન 32 ડિગ્રી સેલ્સિયસ રહેશે.