લખનઉ: અયોધ્યામાં દીપોત્સવના પર્વને વધુ ભવ્ય બનાવવાની તૈયારીઓ શરૂ થઈ ગઈ છે. દીપોત્સવ અંતર્ગત 11 નવેમ્બરે રામ કી પૌડી ખાતે 24 લાખ દીવા પ્રગટાવવામાં આવશે અને દિવાળીના આગલા દિવસે અહીં ‘લાઇટ એન્ડ સાઉન્ડ’ શો શરૂ થશે.જિલ્લા મેજિસ્ટ્રેટ નીતિશ કુમારે સોમવારે જણાવ્યું હતું કે, “11 નવેમ્બરે સરયૂ નદીના કિનારે રામ કી પૌડીમાં 24 લાખ દીવા પ્રગટાવવામાં આવશે. 11 નવેમ્બરથી અયોધ્યાના રામ કી પૌડી ખાતે દરરોજ ભવ્ય લાઇટ એન્ડ સાઉન્ડ શોનું પણ આયોજન કરવામાં આવશે. પ્રવાસન વિભાગ દ્વારા સૂચિત સમયપત્રક મુજબ દરરોજ બે શો થશે અને તેને સરકાર તરફથી લીલી ઝંડી મળી ગઈ છે.
ડીએમએ કહ્યું, “લાઇટ એન્ડ સાઉન્ડ શોના આયોજનની જવાબદારી સરકારી એજન્સી – ઉત્તર પ્રદેશ પ્રોજેક્ટ કોર્પોરેશન લિમિટેડને આપવામાં આવી છે. આ માટે લગભગ 65 ફૂટ ઊંચાઈના બે સ્ટીલના સ્તંભો ઊભા કરવામાં આવશે અને વચ્ચે પડદો મૂકવામાં આવશે.કુમારે કહ્યું કે રામ કી પૌડીમાં લગભગ 20 કરોડ રૂપિયાના ખર્ચે લાઈટ એન્ડ સાઉન્ડ શોનું આયોજન કરવામાં આવશે.
સરયુ આરતી બાદ આ શોમાં રામાયણ પર આધારિત ફિલ્મો બતાવવામાં આવશે. તેમણે કહ્યું, “આ લાઇટ એન્ડ સાઉન્ડ શોનો કાર્યક્રમ સાંજે બે કલાક માટે યોજવામાં આવશે. તે બધા માટે મફત હશે. યોજના હેઠળ આગામી પાંચ વર્ષ સુધી દરરોજ આ શોનું આયોજન કરવામાં આવશે.
અયોધ્યામાં દીપોત્સવની પરંપરા વર્ષ 2017માં યોગી આદિત્યનાથ સરકારની રચના સાથે શરૂ થઈ હતી. તે વર્ષે 51,000 દિવડાઑથી શરૂ કરીને, 2019માં આ સંખ્યા વધીને 4.10 લાખ થઈ, 2020માં છ લાખથી વધુ અને 2021માં નવ લાખની રેકોર્ડ ઊંચી સપાટીએ પહોંચી. ગિનિસ વર્લ્ડ રેકોર્ડમાં તેનો સમાવેશ કરવામાં આવ્યો હતો.
વર્ષ 2022માં રામ કી પૌડીના ઘાટ પર 17 લાખથી વધુ દીવા પ્રગટાવવામાં આવ્યા હતા, પરંતુ ગિનિસ બુક ઓફ વર્લ્ડ રેકોર્ડમાં માત્ર તે જ દીવાઓની ગણતરી કરવામાં આવી હતી જે પાંચ મિનિટ કે તેથી વધુ સમય સુધી પ્રગટ્યા હતા. આ રીતે 15.76 દીવાનો રેકોર્ડ સર્જાયો હતો. ઓક્ટોબરમાં યોજાયેલા છેલ્લા દીપોત્સવમાં વડા પ્રધાન નરેન્દ્ર મોદી મુખ્ય અતિથિ હતા. આ વર્ષની ઘટના એટલા માટે ખાસ હશે કારણ કે અયોધ્યામાં રામ મંદિરના નિર્માણનું કામ પૂરજોશમાં ચાલી રહ્યું છે.
