નવી દિલ્હીઃ નેશનલ ડેમોક્રેટિક એલાયન્સ (NDA) એ સરકાર બનાવવાનો દાવો રજૂ કર્યો છે. શુક્રવારે અનેક રાઉન્ડની બેઠકો બાદ એનડીએ નેતાઓનું એક જૂથ રાષ્ટ્રપતિ દ્રૌપદી મુર્મુજીને મળવા પહોંચ્યું અને સરકાર બનાવવાનો પ્રસ્તાવ રજૂ કર્યો હતો. અમિત શાહ, રાજનાથ સિંહ, જેપી નડ્ડા, નીતિશ કુમાર, એકનાથ શિંદે સહિત 16 પક્ષોના નેતાઓ NDA વતી સરકાર બનાવવાનો દાવો કરવા રાષ્ટ્રપતિ ભવન પહોંચ્યા હતા. વડાપ્રધાન નરેન્દ્ર મોદી પણ સાંજે રાષ્ટ્રપતિ મુર્મુજીને મળવા જશે. તેમને પીએમ તરીકે નોમિનેટ કર્યા પછી, રાષ્ટ્રપતિ સત્તાવાર રીતે શપથ ગ્રહણ સમારોહનો સમય અને સ્થળ નક્કી કરશે.
લોકસભા ચૂંટણીના પરિણામોમાં, એનડીએ જૂથને 293 બેઠકો મળી છે, જે 272ના જાદુઈ બહુમતીના આંકડા કરતાં વધુ છે. જો કે, આ વખતે એનડીએનું નેતૃત્વ કરી રહેલી ભારતીય જનતા પાર્ટી બહુમતીના આંકથી ઘણી ઓછી પડી ગઈ હતી, તેથી બેઠકોનો દોર શરૂ થયો હતો. જો કે, શુક્રવારે બપોરે NDA નેતાઓએ રાષ્ટ્રપતિ મુર્મુજીને મળ્યા અને સરકાર બનાવવાનો દાવો કર્યો અને તમામ અટકળો પર પૂર્ણવિરામ મૂક્યું હતું.
શુક્રવારે (7 જૂન) એનડીએ સંસદીય દળોની બેઠકમાં નરેન્દ્ર મોદીને સંસદીય દળના નેતા તરીકે પસંદ કરવામાં આવ્યા હતા, ત્યારબાદ મોદી લાલકૃષ્ણ અડવાણીના આશીર્વાદ લેવા તેમના ઘરે પહોંચ્યા હતા. સંસદીય દળની બેઠકમાં નરેન્દ્ર મોદીએ કહ્યું કે, એનડીએ ગઠબંધન સૌથી સફળ ગઠબંધન છે. તેમણે કહ્યું, “આ સત્તા મેળવવા, સરકાર ચલાવવા અથવા અમુક પક્ષો માટે લોકોનો મેળાવડો નથી. આ નેશન ફર્સ્ટની મૂળ ભાવનામાં નેશન ફર્સ્ટ માટે પ્રતિબદ્ધ જૂથ છે.”
નરેન્દ્ર મોદીએ કહ્યું હતું કે, “એનડીએ સરકારે દેશને સુશાસન આપ્યું છે અને એક રીતે એનડીએ શબ્દ ગુડ ગવર્નન્સનો પર્યાય બની ગયો છે. ગરીબ કલ્યાણ અને સુશાસન આપણા બધાના કેન્દ્રબિંદુમાં રહ્યા છે. ભારતના રાજકીય ઇતિહાસમાં અને ભારતીય રાજનીતિમાં ગઠબંધનના ઈતિહાસમાં, ચૂંટણી પહેલાનું જોડાણ NDA જેટલું સફળ રહ્યું નથી.” નરેન્દ્ર મોદી 9 જૂને વડાપ્રધાન તરીકે સતત ત્રીજી ટર્મ માટે શપથ લઈ શકે છે, જેમાં વિશ્વના ઘણા નેતાઓ હાજર રહેશે.