રાજકોટઃ પશ્ચિમ રેલવેએ દિવાળીના ટ્રાફિકને પહોંચી વળવા માટે રાજકોટ-બરૌની અને વેરાવળ-સુરત વચ્ચે વિશેષ ભાડા પર ફેસ્ટિવલ સ્પેશિયલ ટ્રેનો ચલાવવાનો નિર્ણય લીધો છે. રાજકોટ ડિવિઝનમાંથી પસાર થતી ફેસ્ટિવલ સ્પેશિયલ ટ્રેનનું સમય પત્રક જાહેર કરી દેવામાં આવ્યું છે. જેમાં ટ્રેન નંબર 09569/09570 રાજકોટ-બરૌની સ્પેશિયલ (સાપ્તાહિક) રાજકોટથી દર શુક્રવારે 12.50 કલાકે ઉપડશે અને રવિવારે 3.30 કલાકે બરૌની પહોંચશે. આ ટ્રેન 10 નવેમ્બર, 2023 થી 29 ડિસેમ્બર, 2023 સુધી ચાલશે.
આ ઉપરાંત ટ્રેન નંબર 09570 બરૌની-રાજકોટ સ્પેશિયલ દર રવિવારે બરૌનીથી 13.45 કલાકે ઉપડશે અને મંગળવારે 05.50 કલાકે રાજકોટ પહોંચશે. આ ટ્રેન 12 નવેમ્બર, 2023 થી 31 ડિસેમ્બર, 2023 સુધી ચાલશે. આ ટ્રેન બંને દિશામાં વાંકાનેર, સુરેન્દ્રનગર, અમદાવાદ, નડિયાદ, આણંદ, છાયાપુરી, રતલામ, શામગઢ, ભવાની મંડી, કોટા, સવાઈ માધોપુર, ગંગાપુર સિટી, બયાના, ફતેહપુર સીકરી, આગ્રાનો કિલ્લો, ટુંડલા, ગોવિંદપુરી, પ્રયાગરાજ, પંડિત દીન દયાલ ઉપાધ્યાય, બક્સર, અરાહ, દાનાપુર, પાટલીપુત્ર અને હાજીપુર સ્ટેશનો પર રોકાશે. આ ટ્રેનમાં એસી 2-ટાયર, એસી 3-ટાયર, સ્લીપર ક્લાસ અને સેક્ધડ ક્લાસ જનરલ કોચ હશે.
જ્યારે ટ્રેન નંબર 09018/09017 વેરાવળ-સુરત સ્પેશિયલ (સાપ્તાહિક) 8 ટ્રીપ્સમાં ટ્રેન નંબર 09018 વેરાવળ-સુરત સ્પેશિયલ વેરાવળથી દર મંગળવારે 11.05 કલાકે ઉપડશે અને તે જ દિવસે 23.45 કલાકે સુરત પહોંચશે. આ ટ્રેન 7 નવેમ્બર, 2023 થી 28 નવેમ્બર, 2023 સુધી ચાલશે. તેવી જ રીતે ટ્રેન નંબર 09017 સુરત-વેરાવળ સ્પેશિયલ સુરતથી દર સોમવારે 19.30 કલાકે ઉપડશે અને બીજા દિવસે 08.05 કલાકે વેરાવળ પહોંચશે. આ ટ્રેન 6 નવેમ્બર, 2023 થી 27 નવેમ્બર, 2023 સુધી ચાલશે. આ ટ્રેન બંને દિશામાં વડોદરા, અમદાવાદ, રાજકોટ, ગોંડલ, જેતલસર, જૂનાગઢ, કેશોદ અને માળીયા હાટીના સ્ટેશન પર ઉભી રહેશે. આ ટ્રેનમાં એસી ચેર કાર, સ્લીપર ક્લાસ, સેક્ધડ સીટિંગ અને સેક્ધડ ક્લાસ જનરલ કોચ હશે.
ટ્રેન નંબર 09569, 09018 અને 09017 માટે બુકિંગ 5 નવેમ્બર, 2023થી તમામ કાઉન્ટર્સ પર અને IRCTC વેબસાઇટ પર ખુલશે. આ ટ્રેન વિશેષ ભાડા પર ફેસ્ટિવલ સ્પેશિયલ ટ્રેન તરીકે દોડશે. ટ્રેનોના સ્ટોપેજ, સમય અને કમ્પોઝિશન સંબંધિત વિગતવાર માહિતી માટે, મુસાફરો કૃપા કરીને www.enquiry.indianrail.gov.in ની મુલાકાત લઈ શકે છે.
