- આકાશમાં જોવા મળશે વાયુસેનાની શક્તિ
- ભારતીય ઈતિહાસમાં પહેલીવાર ઉડશે 75 વિમાન
- રાજપથ પર જોવા મળશે અદભૂત નજારો
દિલ્હી: કોવિડ મહામારી વચ્ચે ભારત બુધવારે એટલે કે આજે 73મો પ્રજાસત્તાક દિવસ ઉજવવા જઈ રહ્યું છે.ગણતંત્ર દિવસનો ઘોંઘાટ કાશ્મીરથી કન્યાકુમારી સુધી ગુંજી રહ્યો છે.આ વર્ષે 26 જાન્યુઆરીએ યોજાનારી પ્રજાસત્તાક દિવસની ઉજવણીમાં અનેક કાર્યક્રમોનું આયોજન કરવામાં આવશે.જેમાંથી અનેક કાર્યક્રમો પ્રથમવાર જોવા મળશે.આ વખતે ભારતીય વાયુસેનાના 75 વિમાનો પહેલીવાર આકાશમાં ઉડતા જોવા મળશે.રાજપથ પર યોજાનારી આ અત્યાર સુધીની સૌથી ભવ્ય ફ્લાયપાસ્ટ હશે.રક્ષા મંત્રાલયે કહ્યું કે, ગ્રાન્ડ ફિનાલે અને પરેડના ‘ફ્લાય-પાસ્ટ’ વિભાગમાં ‘આઝાદી કા અમૃત મહોત્સવ’ના ભાગરૂપે ભારતીય વાયુસેનાના 75 વિમાનો પ્રથમ વખત ઉડતા જોવા મળશે.
મંત્રાલયે કહ્યું કે, ભારતીય વાયુસેનાએ પ્રથમ વખત ફ્લાય-પાસ્ટ દરમિયાન કોકપિટનો વીડિયો બતાવવા માટે દૂરદર્શન સાથે સંકલન કર્યું છે. રાફેલ, સુખોઈ, જગુઆર, એમઆઈ-17, સારંગ, અપાચે અને ડકોટા જેવા જૂના અને વર્તમાન આધુનિક એરક્રાફ્ટ ફ્લાય-પાસ્ટમાં રાહત, મેઘના, એકલવ્ય, ત્રિશુલ, તિરંગા, વિજય અને અમૃત સહિતની વિવિધ રચનાઓ પ્રદર્શિત કરશે.મંત્રાલયે કહ્યું કે, પ્રથમ વખત પરેડ દરમિયાન રાજપથ પર 75 મીટર લંબાઇ અને 15 ફૂટ ઊંચાઇના 10 સ્ક્રોલ પ્રદર્શિત કરવામાં આવશે.રક્ષા અને સંસ્કૃતિ મંત્રાલય દ્વારા સંયુક્ત રીતે આયોજિત ‘કલા કુંભ’ કાર્યક્રમ દરમિયાન સ્ક્રોલ તૈયાર કરવામાં આવ્યા હતા.
જાણકારી અનુસાર, સમારોહ દરમિયાન પાંચ રાફેલ ફાઈટર એરક્રાફ્ટ પરાક્રમ બતાવશે. આ સાથે પોતાની તાકાતનું પણ પ્રદર્શન કરશે. પ્રથમ વખત નેવીના MiG29K અને P8I ફાઈટર એરક્રાફ્ટ પણ ભાગ લઈ રહ્યા છે. ભારતીય વાયુસેનાના પીઆરઓ વિંગ કમાન્ડર ઇન્દ્રનીલ નંદીએ જણાવ્યું હતું કે, “ભારતીય વાયુસેના, આર્મી અને નેવીના એરક્રાફ્ટ સહિત 75 ફાઇટર એરક્રાફ્ટ સાથે પ્રજાસત્તાક દિવસની પરેડ દરમિયાન રાજપથ પર આયોજિત આ સૌથી ભવ્ય ફ્લાયપાસ્ટ હશે. 17 જગુઆર એરક્રાફ્ટ અમૃત મહોત્સવના 75માં વર્ષના આકારમાં આકાશમાં દેખાશે.
