નવી દિલ્હીઃ રશિયાની પોતાની પરમાણુ સેનાને એલર્ટ કર્યા બાદ દુનિયાભરમાં આશંકાના વાદળો ઘેરાવા લાગ્યા છે. વિશ્વમાં સૌથી વધુ પરમાણુ શસ્ત્રોનો ભંડાર ધરાવતા રશિયાની ધમકી ભયાનક છે. રશિયા-યુક્રેન યુદ્ધ વચ્ચે મોસ્કોની આ તૈયારીએ ડરાવી દીધો છે. રશિયાના પરમાણુ હથિયારોની કમાન્ડ કરતી રશિયન ન્યુક્લિયર ડિટરન્ટ ફોર્સિસને સૌથી ખતરનાક ટુકડી માનવામાં આવે છે.
રિપોર્ટ અનુસાર, નાટો દેશોના આક્રમક નિવેદનો બાદ રશિયાના રાષ્ટ્રપતિ વ્લાદિમીર પુતિને આ આદેશ જારી કર્યો છે. માનવામાં આવે છે કે પુતિન આના દ્વારા અમેરિકા અને નાટો પર દબાણ બનાવી રહ્યા છે. સામાન્ય રીતે પરમાણુ હથિયારોની ટુકડીઓ સાથે આવા એકમોને ચેતવણી આપવાની પ્રથા નથી. ઘણા નિષ્ણાતો માને છે કે રશિયા આને માત્ર એક જોખમ તરીકે જોઈ રહ્યું છે. રશિયન વિસ્તારમાં કોઈએ હુમલો કર્યો નથી. કેટલાક અમેરિકન નિષ્ણાતોએ કહ્યું કે રશિયા યુક્રેન કરતા વધુ શક્તિશાળી છે. તેથી, આ ચેતવણીને માત્ર દબાણ તરીકે જોવી જોઈએ.
રશિયન પ્રમુખ પરમાણુ દળોને ચેતવણી આપવાનો હેતુ શું હોઈ શકે? વાસ્તવમાં પશ્ચિમી દેશો અને નાટોએ જે રીતે યુક્રેનને શસ્ત્રોની સપ્લાય અને મદદ કરવાનો નિર્ણય લીધો છે, તે રશિયાને ઉશ્કેરી રહ્યો છે. અમેરિકા અને પશ્ચિમી દેશોએ પણ રશિયા પર આકરા આર્થિક પ્રતિબંધો લગાવ્યા છે. આમાં રાષ્ટ્રપતિ પુતિન અને ઘણા મોટા નેતાઓની સંપત્તિ જપ્ત કરવાનો નિર્ણય પણ લેવામાં આવ્યો છે.
પુતિને શિયન સંરક્ષણ પ્રધાન સર્ગેઈ શોઇગુ અને ચીફ ઑફ સ્ટાફ વેલેરી ગેરાસિમોવ સાથેની બેઠક દરમિયાન પરમાણુ દળને એલર્ટ મોડમાં મૂકવાનો આદેશ આપ્યો હતો. આનો સ્પષ્ટ અર્થ એ છે કે જો પરિસ્થિતિ વધુ વણસે તો રશિયા પરમાણુ હુમલો કરવામાં અચકાશે નહીં.
