યુક્રેનમાં સૈન્ય કાર્યવાહી વચ્ચે રશિયાના વિદેશ મંત્રી ભારતની મુલાકાતે આવશે

નવી દિલ્હીઃ યુક્રેન સામે 34 દિવસ વહેલા રશિયાએ સૈન્ય કાર્યવાહી શરૂ કરી હતી. બંને દેશ વચ્ચે સતત યુદ્ધ ચાલી રહ્યું છે. દરમિયાન રશિયાના વિદેશ મંત્રી સર્ગેઈ લવરોવ ટૂંક સમયમાં ભારતની મુલાકાતે આવે તેવી શકયતા છે. જો કે હજુ સુધી તારીખ જાહેર કરવામાં આવી નથી, પરંતુ માનવામાં આવે છે કે આ અઠવાડિયે રશિયાના વિદેશ મંત્રી દિલ્હી આવે તેવી શકયતા છે.

રશિયાના વિદેશ મંત્રી લવરોવની ભારત મુલાકાત એટલા માટે મહત્વની છે કારણ કે ભારત એવા કેટલાક મોટા દેશોમાંથી એક છે જે યુક્રેન-રશિયા વચ્ચે ચાલી રહેલા યુદ્ધમાં સંપૂર્ણપણે તટસ્થ છે. ભારત યુદ્ધને લઈને યુક્રેન અને રશિયાને સમર્થન આપતું નથી પરંતુ ભારત ઇચ્છે છે કે બંને દેશો વચ્ચે વહેલી તકે શાંતિ સ્થપાય અને યુક્રેનમાં જાનમાલનું નુકસાન અટકાવી શકાય. અમેરિકા અને યુરોપ સહિત મોટાભાગના પશ્ચિમી દેશો રશિયાના વિરોધમાં ઉભા છે અને રશિયા પર પ્રતિબંધો લાદી રહ્યા છે ત્યારે ભારતે ખુલ્લેઆમ રશિયાનો વિરોધ કર્યો નથી. ચીન, UAE અને સાઉદી અરેબિયા જેવા દેશોની જેમ ભારત પણ સંયુક્ત રાષ્ટ્રમાં રશિયા વિરુદ્ધના તમામ પ્રસ્તાવો પર મતદાનથી દૂર રહ્યું છે. આવી સ્થિતિમાં રશિયા ભારત સાથેના સંબંધોને મજબૂત કરવાનો પ્રયાસ કરી રહ્યું છે.

ભારત પણ રશિયાની વિરુદ્ધ જવા માંગતું નથી કારણ કે બંને દેશોની મિત્રતા ઘણી જૂની અને મુશ્કેલ પરિસ્થિતિઓમાં રશિયા ભારતની સાથે રહ્યું હતું. 1971ના પાકિસ્તાન યુદ્ધમાં રશિયાએ અમેરિકાના યુદ્ધ કાફલાને ભારત વિરુદ્ધ કાર્યવાહી કરતા અટકાવ્યા હતા. આજે ભારતના 50 ટકા શસ્ત્રો અને લશ્કરી સાધનો રશિયાથી આયાત કરવામાં આવે છે. AK-203 એસોલ્ટ રાઈફલ્સથી લઈને T-90 ટેન્ક, Mi-17 હેલિકોપ્ટર, MiG અને સુખોઈ ફાઈટર જેટથી લઈને S-400 ડિફેન્સ સિસ્ટમ સુધી, ભારત રશિયા પાસેથી બધું જ ખરીદે છે.પરંતુ યુક્રેન સાથેના યુદ્ધ દરમિયાન રશિયાને ભારતની વધુ જરૂર છે. તેનું મુખ્ય કારણ એ છે કે આજે રશિયા આખી દુનિયામાં અલગ પડી ગયું છે. અમેરિકા સહિત તમામ મોટા દેશોએ તેની સામે પ્રતિબંધો લગાવી દીધા છે. ચીન ચોક્કસપણે રશિયાની સાથે ઊભું હોય તેવું લાગે છે, પરંતુ અમેરિકા અને યુરોપિયન દેશો સાથે ચીનના સંબંધો એટલા સારા નથી.