દિલ્હી વિધાનસભામાંથી સસ્પેન્ડ કરાયેલા ભાજપના સાત ધારાસભ્યોએ હાઈકોર્ટના દરવાજા ખટખટાવ્યાં
નવી દિલ્હી: દિલ્હી વિધાનસભાના બજેટ સત્રના બાકીના સમયગાળા માટે ગૃહમાંથી સસ્પેન્ડ કરવામાં આવેલા ભારતીય જનતા પાર્ટી (BJP)ના સાત ધારાસભ્યોએ દિલ્હી હાઈકોર્ટમાં અરજી કરી હોવાનું જાણવા મળે છે. આ ધારાસભ્યોને બજેટ સત્રની શરૂઆતમાં લેફ્ટનન્ટ ગવર્નરના સંબોધનમાં વારંવાર વિક્ષેપ પાડવા બદલ સસ્પેન્ડ કરવામાં આવ્યા છે.
દિલ્હી હાઈકોર્ટના કાર્યવાહક મુખ્ય ન્યાયાધીશ મનમોહન સિંહ અને ન્યાયમૂર્તિ મનમીત પીએસ અરોરાની બેન્ચ સમક્ષ અરજીની તાત્કાલિક સૂચિબદ્ધ કરવા માટે વિનંતી કરવામાં આવી હતી. બેન્ચે દિવસ દરમિયાન કેસની સુનાવણી કરવાની મંજૂરી આપી હતી. 15 ફેબ્રુઆરીના રોજ, જ્યારે ઉપરાજ્યપાલ તેમના સંબોધન દરમિયાન આમ આદમી પાર્ટી (AAP) સરકારની સિદ્ધિઓને પ્રકાશિત કરી રહ્યા હતા, ત્યારે ભાજપના ધારાસભ્યોએ કથિત રીતે તેમના સંબોધનમાં ઘણી વખત વિક્ષેપ પાડ્યો હતો.
આ કેસનો ઉલ્લેખ કરતા વરિષ્ઠ એડવોકેટ જયંત મહેતાએ કહ્યું કે, ભાજપના ધારાસભ્યોનું સસ્પેન્શન ખોટું છે, જે કાર્યવાહીમાં ભાગ લેવાના તેમના અધિકારને અસર કરે છે. તેમણે કહ્યું કે ધારાસભ્યોને સસ્પેન્ડ કરવાનો પ્રસ્તાવ ગેરબંધારણીય અને નિયમો વિરુદ્ધ છે. તેમણે વધુમાં કહ્યું કે ધારાસભ્યોને વધુમાં વધુ ત્રણ દિવસ માટે સસ્પેન્ડ કરી શકાય છે પરંતુ અહીં સસ્પેન્શન અનિશ્ચિત છે.
જે સાત સભ્યોને સસ્પેન્ડ કરવામાં આવ્યા છે તેમાં મોહન સિંહ બિષ્ટ, અજય મહાવર, ઓપી શર્મા, અભય વર્મા, અનિલ વાજપેયી, જિતેન્દ્ર મહાજન અને વિજેન્દ્ર ગુપ્તાનો સમાવેશ થાય છે. બજેટને અંતિમ સ્વરૂપ આપવામાં વિલંબને કારણે દિલ્હી વિધાનસભાનું બજેટ સત્ર માર્ચના પહેલા સપ્તાહ સુધી લંબાવવામાં આવ્યું છે.
