મુંબઈ:ફિલ્મ ‘જવાન’ બોક્સ ઓફિસ પર ધૂમ મચાવી રહી છે. પહેલા અઠવાડિયે કમાણીના મામલામાં સારો બિઝનેસ કરનાર શાહરૂખ ખાનની ફિલ્મે બીજા અઠવાડિયે પણ શાનદાર એન્ટ્રી કરી છે. છેલ્લા 7 દિવસમાં રેકોર્ડ બ્રેક કલેક્શન કરનાર ડાયરેક્ટર એટલીની ફિલ્મ દિવસેને દિવસે મજબૂત બની રહી છે.
આ દરમિયાન શાહરૂખ ખાનની ‘જવાન’ના 8મા દિવસના બોક્સ ઓફિસ કલેક્શનના આંકડા સામે આવ્યા છે, જે બતાવવા માટે પૂરતા છે કે આ ફિલ્મનું તોફાન અત્યારે અટકવાનું નથી.
વિવેચકોથી લઈને પ્રેક્ષકો સુધી દરેકને શાહરૂખ ખાન અને નયનતારા જેવા ઘણા સ્ટાર્સ અભિનીત ફિલ્મ ‘જવાન’ પાસેથી ઘણી અપેક્ષાઓ હતી, જે 7મી સપ્ટેમ્બરે મોટા પડદા પર રિલીઝ થઈ હતી. સ્થિતિ એ છે કે અત્યાર સુધી આ ફિલ્મ દરેકની અપેક્ષાઓ પર ખરી ઉતરી છે.
ફિલ્મની સ્ટોરીલાઇનથી લઈને વિજય સેતુપતિ અને તમામ સ્ટાર કાસ્ટના અભિનયથી તેણે ચાહકોનું દિલ જીતી લીધું, જેના કારણે ફિલ્મને બોક્સ ઓફિસ પર બમ્પર સફળતા મળી. આ દરમિયાન જો આપણે ‘જવાન’ના 8મા દિવસના કલેક્શન પર નજર કરીએ તો, સૈકનિલ્કના શરૂઆતના ટ્રેડ મુજબ, શાહરૂખની આ ફિલ્મે અંદાજે 18-20 કરોડનો બિઝનેસ કર્યો છે.આ આંકડો તમામ ભાષાઓમાં ફિલ્મની કમાણીનો છે. સ્પષ્ટપણે કહીએ તો, ‘પઠાણ’ પછી શાહરૂખ ખાને ‘જવાન’ દ્વારા હલચલ મચાવી છે.
જો 8મા દિવસનું સંભવિત કલેક્શન ઉમેરવામાં આવે તો ફિલ્મ ‘જવાન’ની કમાણીમાં નોંધપાત્ર વધારો થયો છે. આ હિસાબે હવે શાહરૂખ ખાનની ફિલ્મનું કુલ બોક્સ ઓફિસ કલેક્શન 386 કરોડ રૂપિયાને પાર કરી ગયું છે. એટલું જ નહીં, શાહરૂખની જવાન આવી પહેલી ફિલ્મ બની છે,જેણે 6 દિવસમાં બોક્સ ઓફિસ પર 300 કરોડ રૂપિયાનો આંકડો પાર કરી લીધો છે. આ મામલે ‘જવાન’એ સની દેઓલની ‘ગદર 2’, ‘પઠાણ’ અને ‘બાહુબલી 2’ જેવી ઘણી મોટી ફિલ્મોને પાછળ છોડી દીધી છે.