સાઉથના જાણીતા ડાયરેક્ટર શિવ નિર્વાણ આગામી દિવસોમાં એક મલ્ટી સ્ટાર ફિલ્મ બનાવવાનું વિચારી રહ્યાં છે, એટલું જ નહીં આ ફિલ્મમાં સાઉથના સુપર સ્ટાર સૂર્યા અને તેનો ભાઈ કાર્તિ પ્રથમવાર સાથે કામ કરતા જોવા મળે તેવી ચર્ચાઓ વહેતી થઈ છે. બંને ભાઈઓને સ્ક્રીન પર એકસાથે જોવા માટે ચાહકો આતુર છે.
શિવ નિર્વાણ તેની પાછલી ફિલ્મ કુશી પછી નાગા ચૈતન્ય સાથે ફિલ્મ બનાવવા જઈ રહ્યા હતા. જોકે બાદમાં આ પ્રોજેક્ટ બંધ કરી દેવામાં આવ્યો હતો. અહેવાલ મુજબ, આ પ્રોજેક્ટ અજ્ઞાત કારણોસર બંધ કરવામાં આવ્યો છે. એક અહેવાલ મુજબ, શિવ નિર્વાણ હાલમાં એક મલ્ટી-સ્ટારર ફિલ્મ લખી રહ્યો છે. તેઓ આ ફિલ્મ માટે સુર્યા અને કાર્તિને સાથે લાવવાની યોજના બનાવી રહ્યા છે.
સાઉથના સુપરસ્ટાર સૂર્યા અને કાર્તિ ભાઈઓ છે અને બંને કલાકારો હંમેશા સાથે ફિલ્મ બનાવવા ઈચ્છતા હતા, પરંતુ તેમને કોઈ યોગ્ય સ્ક્રિપ્ટ મળી ન હતી. અહેવાલ મુજબ, હવે શિવ નિર્વાણ એક નક્કર સ્ક્રિપ્ટ તૈયાર કરી રહી છે જેમાં બે હીરો હોવાનો અવકાશ છે, તેથી નિર્માતા ઇચ્છે છે કે સુર્યા અને કાર્તિ બંને આ ફિલ્મનો ભાગ બને. હવે તો સમય જ કહેશે કે બંનેને આ સ્ટોરી ગમશે અને તેમાં કામ કરશે કે કેમ, પરંતુ જો આવું થશે તો બંનેના ફેન્સ ખૂબ જ ખુશ થશે.
બંને કલાકારોના વર્ક ફ્રન્ટ વિશે વાત કરીએ તો, કાર્તિની ફેમિલી ડ્રામા મેયાઝગન તાજેતરમાં રિલીઝ કરવામાં આવી છે. આ ફિલ્મને પણ બોક્સ ઓફિસ પર દર્શકોનો ઘણો પ્રેમ મળ્યો છે. આ ફિલ્મમાં કાર્તિની સાથે અરવિંદ સ્વામી પણ મહત્વના રોલમાં છે. સૂર્યાના વર્ક ફ્રન્ટ વિશે વાત કરીએ તો, હાલ તે તેની આગામી ફિલ્મ કંગુવાની રિલીઝમાં વ્યસ્ત છે, જે 14 નવેમ્બર, 2024 ના રોજ થિયેટરોમાં આવશે. આ ફિલ્મમાં તેના સિવાય બોલિવૂડ એક્ટર બોબી દેઓલ પણ જોવા મળશે.
