નવા ટાઉન પ્લાનિંગ સ્કીમ (TP)માં ફાઈનલ પ્લોટ્સના ક્ષેત્રફળ મુજબ જ હવે સ્ટેમ્પ ડ્યુટીની વસુલાત કરાશે

અમદાવાદ: રાજ્યમાં નવા ટાઉન પ્લાનિંગ સ્કીમ (TP)માં ફાઈનલ પ્લોટ્સના ક્ષેત્રફળ મુજબ જ હવે સ્ટેમ્પ ડ્યુટીની વસુલાત કરવાનો નિર્ણય કરાયો છે. સબ રજિસ્ટાર, નાયબ કલેક્ટરની કચેરીઓ દ્વારા જે વિસ્તારમાં નવી ટાઉન પ્લાનિંગ (TP) સ્કીમો અમલમાં છે, અને પ્રાથમિક તબક્કામાં છે. કે, પછી તેનો ઈરાદો જાહેર થયો છે, તેવા વિસ્તારોમાં ફાઈનલ પ્લોટ (FP)ને બદલે જમીનના સંપૂર્ણ ક્ષેત્રફળના આધારે સ્ટેમ્પ ડ્યુટી વસૂલવામાં આવી રહ્યાની બાબત સરકારના ધ્યાનમાં આવી હતી. જેથી સુપ્રિન્ટેન્ડન્ટ ઓફ સ્ટેમ્પની કચેરીએ જુલાઈ-2016ની મૂળ સૂચના ફરીથી પરિપત્રિત કરીને ફાઈનલ પ્લોટમાં દર્શાવેલા ક્ષેત્રફળ પુરતી જ સ્ટેમ્પ ડ્યુટી વસૂલવા આદેશ કર્યો છે.

સૂત્રોના જણાવ્યા મુજબ રાજ્યમાં નવા ટાઉન પ્લાનિંગ સ્કીમ (TP)માં ફાઈનલ પ્લોટ્સના ક્ષેત્રફળ મુજબ સ્ટેમ્પ ડ્યુટીની વસુલાત કરાતી ન હોવી ફરિયાદો ઊઠી હતી. રાજ્યના મહાનગરો અને શહેરી વિકાસ સત્તામંડળોમાં પહેલેથી જ્યાં ટીપી સ્કીમનો ઈરાદો જાહેર થયો હોય, ડ્રાફ્ટ ટીપી હોય કે પછી પ્રાથમિક કે અંતિમ સ્ટેજ પર હોય, ત્યારે ખેતીની જમીન બિનખેતી કરવાના તબક્કે એફ-ફોર્મમાં દર્શાવાયેલા ફાઈનલ પ્લોટના ક્ષેત્રફળને ધ્યાને લઈને પ્રીમિયમની ગણતરી થાય છે. જ્યાં એફ ફોર્મ ન હોય ત્યાં સામાન્ય રીતે 40 ટકા કપાતનું ધોરણ ધ્યાને લેવાય છે. મહેસૂલ વિભાગના બીજી ઓગસ્ટ 2018ના ઠરાવથી આ જ પ્રેક્ટિસ અમલમાં છે. પરંતુ  કેટલાક નવા ક્ષેત્રો અને જિલ્લાઓમાં જ્યાં ટીપી સ્કીમો અમલમાં આવી રહી છે, ત્યાં સબ રજિસ્ટારો દ્વારા ફાઈનલ પ્લોટનું ક્ષેત્રફળ એટલે કે, કપાત પછી જમીન માલિક કે ડેવલોપર્સના ઉપયોગ માટે બચતી જમીનના ક્ષેત્રફળને ધ્યાનમાં લીધા વિના જ 100 ટકા સ્ટેમ્પ ડ્યૂટી વસૂલવાનું શરૂ કરાયું હતું. જેથી ફરિયાદો સુપ્રિડેન્ટન્ટ ઓફ સ્ટેમ્પની કચેરીને મળી હતી. જેથી કચેરી દ્વારા કપાતના ધોરણો મુજબ મૂળ જમીનના ક્ષેત્રફળમાં કપાત બાદના ફાઈનલ પ્લોટના ક્ષેત્રફળને ધ્યાને લઈને જમીન કે સ્થાવર મિલકતની બજાર કિંમત નક્કી કરવા બે સપ્તાહ પહેલા આદેશ કર્યો છે. જેમાં 2011ની જંત્રીના આધારે જમીનની બજાર કિંમત નક્કી કરતી વખતે ટીપી હેઠળના ફાઈનલ પ્લોટના ક્ષેત્રફળની ગણતરી કરવા પરિપત્ર કરાયો છે.