ધો.9થી12ના અભ્યાસક્રમમાં ઘટાડો નહીં કરાય, ધો. 10 અને 12ની પરીક્ષા 14મી માર્ચથી લેવાશે
અમદાવાદઃ કોરોનાના કેસમાં ખાસ્સો ઘટાડો થયા બાદ અને સરકારે મંજુરી આપતા ધો.6થી 12 અને કોલેજોમાં ઓફલાઈન શિક્ષણ કાર્ય શરૂ થઈ ગયું છે. ત્યારે ગુજરાત માધ્યમિક અને ઉચ્ચતર માધ્યમિક શિક્ષણ બોર્ડ દ્વારા ધોરણ-9થી 12નું એકેડેમિક કેલેન્ડર પણ જાહેર કરવામાં આવ્યું છે. જેમાં સમગ્ર વર્ષ દરમિયાન અભ્યાસના દિવસો, રજા અને પરીક્ષા અંગેનું આયોજન જાહેર કરવામાં આવ્યું છે. જે મુજબ આ વર્ષે અભ્યાસના 248 દિવસ નક્કી કરવામાં આવ્યા છે. જ્યારે 80 રજા જાહેર કરાઈ છે. બોર્ડ દ્વારા જાહેર કરાયેલા કેલેન્ડર મુજબ શિક્ષણ બોર્ડની ધોરણ-10 અને 12ની પરીક્ષા 14 માર્ચ, 2022થી લેવામાં આવશે. આ વખતે બોર્ડ દ્વારા તમામ પરીક્ષાઓ ઓફલાઈન લેવાની જાહેરાત કરી છે. જોકે, કોવિડની સ્થિતિને લઈ સરકાર દ્વારા નિર્ણયમાં ફેરફાર કરાય તો તે મુજબ પરીક્ષા લેવાશે. ઉપરાંત ગત વર્ષની જેમ આ વખતે અભ્યાસક્રમમાં ઘટાડો કરવામાં આવશે નહીં તેવી પણ સ્પષ્ટતા બોર્ડ દ્વારા કરવામાં આવી છે.
સૂત્રોના જણાવ્યા મુજબ ગુજરાત માધ્યમિક અને ઉચ્ચતર માધ્યમિક શિક્ષણ બોર્ડ દ્વારા ચાલુ શૈક્ષણિક વર્ષ માટેનું એકેડેમિક કેલેન્ડર જાહેર કર્યું છે. જે મુજબ ધોરણ-9થી 12ની પ્રથમ પરીક્ષા 18 ઓક્ટોબર, 2021થી 27 ઓક્ટોબર, 2021 દરમિયાન લેવાનું આયોજન કરવામાં આવ્યું છે. જ્યારે પ્રિલીમ પરીક્ષા 27 જાન્યુઆરીથી 4 ફેબ્રુઆરી દરમિયાન લેવામાં આવશે. ધોરણ-9ના વિદ્યાર્થીઓ માટે લેવામાં આવતી પ્રખરતા શોધની કસોટી 7 ફેબ્રુઆરી દરમિયાન લેવાનું આયોજન કરવામાં આવ્યું છે. ધોરણ-10 અને 12ની બોર્ડના વિષયની શાળા કક્ષાએ લેવાની પરીક્ષા તથા પ્રાયોગિક પરીક્ષા 9 ફેબ્રુઆરી, 2022થી 11 ફેબ્રુઆરી, 2022 દરમિયાન લેવાશે. ધોરણ-12 સાયન્સની પ્રાયોગિક પરીક્ષા 14 ફેબ્રુઆરી, 2022થી 23 ફેબ્રુઆરી, 2022 દરમિયાન લેવાશે. જ્યારે ધોરણ-10 અને 12ની બોર્ડની પરીક્ષા 14 માર્ચ, 2022થી 30 માર્ચ, 2022 દરમિયાન લેવાશે. ધોરણ-9 અને 11ની શાળાકીય વાર્ષિક પરીક્ષા 11 એપ્રિલ, 2022થી 21 એપ્રિલ, 2022 દરમિયાન લેવામાં આવશે.
બોર્ડ દ્વારા જાહેર કરાયેલા એકેડેમિક કેલેન્ડર અનુસાર હાલમાં પરીક્ષા અંગેનો કાર્યક્રમ નક્કી કરવામાં આવ્યો છે. જેમાં તમામ પરીક્ષાઓ ઓફલાઈન લેવામાં આવશે તેવી જાહેરાત કરાઈ છે. પરંતુ કોવિડ-19ની પરિસ્થિતિને કારણે સરકાર દ્વારા આ અંગે જો કોઈ નિર્ણય કરવામાં આવે તો તે મુજબ ઓફલાઈન અથવા ઓનલાઈન લેવાની રહેશે. ચાલુ શૈક્ષણિક વર્ષ દરમિયાન ધોરણ-9થી 12ના અભ્યાસક્રમમાં કોઈ ઘટાડો કરવામાં નહીં આવે તેવી સ્પષ્ટતા પણ બોર્ડ દ્વારા કરાઈ છે. ધોરણ-9થી 12ની પ્રથમ પરીક્ષા માટે જૂનથી સપ્ટેમ્બર સુધીનો અભ્યાસક્રમ રહેશે. ધોરણ-10 અને 12ની પ્રિલીમ પરીક્ષા માટે સંપૂર્ણ અભ્યાસક્રમ રહેશે. ધોરણ-9 અને 11ની દ્વિતિય પરીક્ષા માટે જૂનથી જાન્યુઆરી સુધીનો અભ્યાસક્રમ રહેશે. જેમાં જૂનથી સપ્ટેમ્બર સુધીના અભ્યાસક્રમમાંથી 30 ટકા અભ્યાસક્રમ અને ઓક્ટોબરથી જાન્યુઆરી સુધીના અભ્યાસક્રમમાંથી 70 ટકા અભ્યાસક્રમ રહેશે.
ચાલુ શૈક્ષણિક વર્ષમાં પ્રથમ સત્રમાં અભ્યાસના 118 દિવસ રહેશે. જ્યારે દ્વિતિય સત્રના 130 દિવસ રહેશે. પ્રથમ સત્ર 7 જૂન, 2021થી લઈને 31 ઓક્ટોબર, 2021 સુધી 118 દિવસનું રહેશે. ત્યારબાદ 1 નવેમ્બર, 2021થી 21 નવેમ્બર, 2021 દરમિયાન 21 દિવસનું દિવાળી વેકેશન રહેશે. બીજા સત્રનો પ્રારંભ 22 નવેમ્બર, 2021થી થશે અને 1 મે, 2021 સુધી 130 દિવસનું રહેશે. ત્યારબાદ 2 મે, 2022થી 5 જૂન, 2022 સુધી 35 દિવસનું ઉનાળું વેકેશન રહેશે. ત્યારબાદ 6 જૂન, 2022થી નવા શૈક્ષણિક વર્ષનો પ્રારંભ થશે. વર્ષ દરમિયાન બોર્ડ દ્વારા કુલ 80 રજા જાહેર કરવામાં આવી છે. જેમાં દિવાળી વેકેશનની 21 દિવસની રજા, ઉનાળું વેકેશનની 35 દિવસની રજા, 16 જાહેર રજા અને 8 સ્થાનિક રજાનો સમાવેશ થાય છે.
