મુંબઈઃ દેશમાં નશીલા દ્રવ્યોની હેરાફેરીને ડામવા માટે સુરક્ષા એજન્સીઓ સાબદી બની છે, તેમજ ડ્રગ્સ માફિયાઓ સામે તપાસ કરવામાં આવી રહી છે. દરમિયાન મુંબઈ એરપોર્ટ ઉપરથી ડીઆરઈની ટીમે વિદેશી નાગરિકને કોકેઈનના જથ્થા ઝડપી લેવામાં આવ્યો હતો. ડીઆરઆઈની ટીમે વિદેશી નાગરિક પાસેથી રૂ. 35 કરોડની કિંમતનો કોકેઈનનો જથ્થો પકડ્યો છે.
સુત્રોના જણાવ્યા અનુસાર, ડિરેક્ટોરેટ ઓફ રેવન્યુ ઈન્ટેલિજન્સ (DRI)એ મુંબઈના છત્રપતિ શિવાજી મહારાજ ઈન્ટરનેશનલ એરપોર્ટ પર સિએરા લિયોનથી આવતા એક લાઈબેરિયન નાગરિકને પકડી પાડ્યો હતો. મુસાફરની ટ્રોલી બેગની તપાસ દરમિયાન, DRI અધિકારીઓને ખ્યાલ આવ્યો હતો કે કંઈક અસામાન્ય રીતે ભારે છે. જે બાદ ઝીણવટભરી તપાસ કરવામાં આવતા સફેદ પાવડર જેવો પદાર્થ ધરાવતાં બે પેકેટો મળી આવ્યા હતા જે ટ્રોલી બેગમાં બનાવેલા નકલી ખાનામાં કુશળ રીતે છુપાવવામાં આવ્યા હતા.
ક્ષેત્રીય પરીક્ષણોએ આ પદાર્થ કોકેઈન હોવાની પુષ્ટિ કરી હતી, જેનું વજન કુલ 3496 ગ્રામ હતું, જેની અંદાજિત ગેરકાયદે બજાર કિંમત આશરે રૂ. 34.96 કરોડ રૂપિયા છે. મુસાફરની ધરપકડ કરવામાં આવી છે, અને તપાસ ચાલુ છે. DRI માદક દ્રવ્યોની હેરાફેરી કરતી સિન્ડિકેટને ખતમ કરવા અને આપણા નાગરિકોને ડ્રગના ખતરાથી સુરક્ષિત રાખવા માટે પ્રતિબદ્ધ છે.