T20 વિશ્વકપઃ ભારત-ઈંગ્લેન્ડ વચ્ચેની સેમિફાઈનલ ઉપર વરસાદના વાદળો છવાયાં, ક્રિકેટ પ્રેમીઓ ચિંતામાં મુકાયાં
નવી દિલ્હીઃ અમેરિકા અને વેસ્ટઈન્ડિઝમાં આઈસીસી ટી20 વિશ્વકપ રમાઈ રહ્યો છે. સુપર એઈટનો મુકાબલો પૂર્ણ થયો છે અને ભારત, અફઘાનિસ્તાન, દક્ષિણ આફ્રિકા તથા ઈંગ્લેન્ડ સેમિફાઈનલમાં પ્રવેશી છે. આવતીકાલે પ્રથમ દક્ષિણ આફ્રિકા અને અફઘાનિસ્તાન તથા બીજી ભારત-ઈંગ્લેન્ડ વચ્ચે સેમિફાઈનલ રમાશે. આ બંને મેચમાં જીતનાર ટીમ ફાઇનલમાં પ્રવેશ કરશે. દરમિયાન આવતીકાલે ભારત-ઈંગ્લેન્ડની સેમિફાઈનલને લઈને ક્રિકેટ પ્રેમીઓમાં ભારે ઉત્સાહ જોવા મળી રહ્યો છે. જો કે, આવતીકાલની મેચમાં વરસાદ વિઘ્ન બને તેવી શક્યતાઓ વ્યક્ત થઈ રહી છે.
ભારતીય ટીમ T20 વર્લ્ડ કપ 2024માં અત્યાર સુધી અજેય રહી છે. બીજી તરફ ઇંગ્લેન્ડને ગ્રુપ સ્ટેજ અને સુપર-8માં એક-એક મેચમાં હારનો સામનો કરવો પડ્યો છે. રોહિત શર્માની ટીમે ઓસ્ટ્રેલિયાને 24 રને હરાવીને સેમિફાઇનલમાં પ્રવેશ કર્યો હતો, જ્યારે ઇંગ્લેન્ડે અમેરિકાને 10 વિકેટે હરાવ્યું હતું. સેમિફાઇનલની બીજી મેચ ભારતીય સમય અનુસાર રાત્રે 8 વાગ્યાથી ગયાનાના પ્રોવિડન્સ સ્ટેડિયમમાં રમાશે. આ મેચમાં ભારતની નજર ઈંગ્લેન્ડ સામેની પાછલી હારનો બદલો લેવા પર હશે. હકીકતમાં, T20 વર્લ્ડ કપ 2022માં, ઇંગ્લિશ ટીમે સેમિફાઇનલમાં ભારતને 10 વિકેટથી હરાવીને ફાઇનલની રેસમાંથી બહાર કરી દીધું હતું. હવે રોહિત શર્મા અને કંપની તેમની ભૂતકાળની ભૂલોમાંથી શીખીને ઈંગ્લેન્ડને હરાવવા માંગે છે.
ભારત અને ઈંગ્લેન્ડની મેચ પર વરસાદનો પડછાયો છવાયેલો છે. હવામાન અહેવાલ અનુસાર, ગયાનામાં સવારે વરસાદની 70 ટકા સંભાવના છે. તેમજ, તાપમાન 31 ડિગ્રી સેલ્સિયસની આસપાસ રહેવાની સંભાવના છે. આ મેચની વિજેતા ટીમ ફાઇનલમાં પ્રવેશ કરશે. જો કે મેચના દિવસે વરસાદ અને ભારે પવન ફુંકાવવાની સંભાવના છે.
જો T20 વર્લ્ડ કપ 2024માં ભારત અને ઈંગ્લેન્ડ વચ્ચેની બીજી સેમીફાઈનલ મેચ વરસાદને કારણે ધોવાઈ જશે તો ભારતીય ટીમને ફાયદો થશે. ખરેખર, ભારતે ગ્રુપ સ્ટેજ અને સુપર-8માં તેની તમામ મેચો જીતી લીધી છે. સુપર-8માં ભારતે તેની ત્રણેય મેચ જીતી છે. તેમના ખાતામાં છ પોઈન્ટ છે જ્યારે ઈંગ્લેન્ડના ખાતામાં ચાર પોઈન્ટ છે. તેના આધારે ભારત સરળતાથી ફાઈનલ માટે ક્વોલિફાય થઈ જશે. આ મેચ ગુયાનાના પ્રોવિડન્સ સ્ટેડિયમમાં રમાશે, જેને લો સ્કોરિંગ અને સ્પિન માટે અનુકૂળ મેદાન માનવામાં આવે છે. આનાથી ઝડપી બોલરો કરતાં સ્પિનરોને વધુ મદદ મળી અને બેટ્સમેનોને વધુ રન બનાવવા માટે ઘણો સંઘર્ષ કરવો પડ્યો.
